Muqdisho (SONNA): Hay’adda Isgaarsiinta Qaranka (HIQ) iyo Xarunta Qaran ee IPv6, oo ay martigeliso Jaamacadda Jamhuuriya, ayaa maanta si wadajir ah u qabtay Aqoon-isweydaarsi ku saabsan Internet Baratakoolka Nooca Lixaad (IPv6), kaas oo ay ka soo qayb galeen Bixiyeyaasha Adeegyada Internet-ka (ISPs), jaamacadaha, xirfadlayaasha ICT-da, khubarada isgaarsiinta iyo teknoolojiyadda, iyo daneeyayaal kale si ay uga wada hadlaan mustaqbalka kaabeyaasha isgaarsiinta internet-ka iyo hirgelinta IPv6 ee Soomaaliya.
Aqoon-isweydaarsigan ayaa noqday madal lagu xoojinayo wacyiga ku saabsan hirgelinta IPv6, lagu adkaynayo iskaashiga daneeyayaasha kala duwan, laguna taageerayo himilooyinka isbeddelka dhijitaalka ah ee Soomaaliya iyada oo la dhiirrigelinayo adeegsiga teknoolojiyadda jiilka xiga ee internet-ka iyo horumarinta kaabeyaasha dhijitaalka ah ee dalka.
Eng. Maxamed Axmed Maxamuud, Guddoomiyaha Jaamacadda Jamhuuriya ee Sayniska iyo Tiknoolajiyadda (JUST), oo ka hadlay munaasabadda, ayaa muujiyay muhiimadda ay leedahay diyaarinta jiilka cusub ee xirfadlayaasha ICT-da si ay u taageeraan mustaqbalka dhijitaalka ah ee Soomaaliya.
“Diyaarinta jiilka cusub ee xirfadlayaasha ICT-du waa tiir muhiim u ah mustaqbalka dhijitaalka ah ee Soomaaliya. Jaamacaduhu waxay door weyn ku leeyihiin horumarinta aqoonta, cilmi-baarista iyo hal-abuurka la xiriira IPv6, iyo sidoo kale tayeynta ardayda si ay uga qayb qaataan isbeddelka dhijitaalka ah ee dalka,” ayuu yiri.
Isagoo ka hadlay furitaanka aqoon-isweydaarsiga, Mudane Mustafa Yaasiin Sheekh, Maareeyaha Guud ee Hay’adda Isgaarsiinta Qaranka, ayaa ka hadlay sida ay Hay’adda uga go’an tahay in Soomaaliya ay la jaanqaaddo horumarka teknoolojiyadda ee caalamka iyada oo la hirgelinayo IPv6.
“Himiladeennu mar walba waxay ahayd in Soomaaliya aysan ka harin isbeddellada teknoolojiyadda ee dunida. Maanta waxa aynu qorshaynaynaa ma aha oo keliya baahiyaha internet-ka ee maanta jira, balse sidoo kale waxa aynu ka fikiraynaa sidii jiilasha mustaqbalka ay u heli lahaayeen teknoolojiyadda casriga ah ugana faa’iidaysan lahaayeen koboca dhaqaalaha dhijitaalka ah. Waxa aanu ku faraxsanahay in wixii markii hore ahaa hiigsi lagu dhisayo Xarunta Qaran ee IPv6 ay maanta noqdeen xaqiiqo hirgashay oo taageeraysa geeddi-socodkan,” ayuu yiri.
Intii uu socday aqoon-isweydaarsigu, khubaro kala duwan ayaa soo bandhigay mowduucyo la xiriira hirgelinta IPv6, kuwaas oo ay ka mid ahaayeen baahida loo qabo istaraatiijiyad qaran oo IPv6 ah, hirgelinta farsamada iyo geeddi-socodka kala-guurka, siyaasadaha iyo maamul-wanaagga, qorshaynta cinwaannada IP-ga, iyo qaab-dhismeedyada siyaasadeed ee lagama maarmaanka u ah hirgelinta guuleysata ee IPv6 ee Soomaaliya.
