Muqdisho (SONNA): Agaasimaha Guud ee Wasaaradda Arrimaha Gudaha, Federaalka iyo Dib u heshiisiinta XFS mudane Abdulkadir Ali ayaa soo xiray meertada 3-aad ee Madasha Maayarada dalka oo saddexdii maalmood ugu dambeyday ka socday caasimadda Muqdisho isaga oo u mahadceliyey kaqeybgalayaasha oo ay ugu horeeyaan Maayarada, Guddoomiyeyaasha, gobolka Banaadir iyo bahwadaagta.
Agaasime Cabdul oo gebogabada ka hadlay ayaa ku dheeraaday howlaha la qabtay maalmihii tagay isaga oo xusay in madashani 3-aad lagu wadaagay aragtida iskaashiga, heerka abaaraha iyo baahiyada, khilaafaadka iyo sidii jawaab mideysan looga bixin .
Agaasimaha Guud ee Wasaaradda waxaa uu intaa raaciyey in dowladaha hoose oo lala hadlo si toos ah ay ka dhigan tahay qaangaarnimo hey’adaha dowladda iyo sidii loo tayeyn lahaa dowladnimada isaga oo adkeeyey In adeegyada la mideeyo sida adeegga iyo howlaha Dad-dhigista.
Munaasabadda xiritaanka ayaa waxaa hadalo ka jeediyay Afhayeenka Xukuumadda Cabdinaasir Axmed Bashiir oo duqoowda magaalooyinka iyo waftiyada ka socday illaa 40 degmo oo dalka kula dardaarmay in ay xoogga saaraan wacyigalinta bulshada, isaga oo dhanka kale sheegay sida xukuumadda Dan Qaran uga goantahay horumarinta hawlaha dowladaha hoose, waxaa sidoo kale hadalo ka jeediyay agaasimeyaasha wasaaradaha arrimaha gudaha dowlad goboleedyada qaar.
Ugu dambeyntii, Agaasimaha Guud mudane Cabdul waxaa uu ku celiyey sida Wasaaradda Arrimaha Gudaha Soomaaliya uga go’antahay in mashaariicdu gaaraan guud ahaan deegaannada dalka.
