Muqdisho (SONNA): Wasiirka Ganacsiga iyo Warshadaha Dowladda Federaalka Soomaaliya Mudane Jamaal Maxamed Xassan ayaa maanta daah-furay shir wada-tashi ah oo ay isugu yimaadeen hay’adaha dowladda, ganacsatada Soomaaliyeed, iyo la-hawlgalayaasha horumarinta.
Shirkan ayaa diiradda lagu saaray is-dhexgalka ganacsiga ee dalalka Geeska Afrika, gaar ahaan Hindisaha Horn of Africa Initiative, iyo sidii loo fududeyn lahaa ganacsiga, kor loogu qaadi lahaa isku-xirka suuqyada, loona xoojin lahaa fursadaha ganacsi ee Soomaaliya iyo dalalka deriska ah.
Wada-tashigan ayaa sidoo kale hordhac u ah shir heer gobol ah oo lagu wado inuu ka dhaco magaalada Addis Ababa ee dalka Itoobiya bisha Sebtembar 2026, kaas oo ay ka qeyb geli doonaan dalalka Soomaaliya, Kenya, Itoobiya, Jabuuti iyo Koonfurta Suudaan.
Sidoo kale, Wasiirka ayaa kulan gaar ah la yeeshay la-hawlgalayaasha horumarinta kala ah Midowga Yurub, Safaaradda Jarmalka ee Soomaaliya iyo Bangiga Adduunka, iyagoo ka wada hadlay taageerada horumarinta ganacsiga, fududeynta isu-socodka ganacsiga iyo xoojinta iskaashiga dhaqaale ee gobolka.
Wasaaradda Ganacsiga iyo Warshadaha ayaa sii wadi doonta dadaallada lagu horumarinayo ganacsiga Soomaaliya, laguna xoojinayo doorka ganacsatada Soomaaliyeed ee is-dhexgalka dhaqaale ee gobolka.
