Wasiirka Warfaafinta XFS oo la kulmay Danjiraha Shiinaha ee Soomaaliya+Sawirro

La wadaag cid kale

Muqdisho(SONNA) Wasiirka Warfaafinta Xukuumadda Federaalka Soomaaliya mudane Cismaan Dubbe ayaa maanta kulan la qaatay safiirka dowladda Shiinaha u fadhiya Soomaaliya Qin Jian, iyaga oo ka wada hadlay arrimo ay kamid yihiin xoojinta xiriirka labada Dal.

Kulanka wasiirka Warfaafinta uu la qaatay Danjire Qin Jian waxaa ku wehlinayey Agaasimaha Wakaaladda Wararka Qaranka ee (SONNA) Cali C/qaadir Cali iyo lataliye Mubaarak Cabdiraxmaan. Waxaana mudadii uu kulankaasi socday diiradda lagu saaray xoojinta iskaashiga warbaahinta labada dal, iskuxirka Wakaaladaha SONNA iyo Xinhua ee Soomaaliya iyo Shiinaha, Televeshinka Qaranka Soomaaliyeed iyo Kan Dalkaasi ee CCTV iyo Radio Muqdisho.

Mudane Cismaan Dubbe Wasiirka Warfaafinta Soomaaliya ayaa uga mahadceliyay Safiirka Shiinaha wada shaqeynta kala dhaxaysa Warbaahinta Dowladda, isaga oo xusay in loo baahan yahay in la kordhiyo fursadaha sare loogu qaadayo aqoonta shaqaalaha warbaahinta Qaranka, si loo tayeeyo adeegyada ay u hayaan bulshada Soomaaliyeed.

Waxay sidoo kale ay isla garteen muhiimadda ay leedahay xoojinta xiriirka saaxiibtinimo ee soo jireenka ah ee u dhexeeya alabada dowladood, lagana hortago waxkasta oo xiriirkaasi wax u dhimi kara.

Danjire Qin Jian ayaa soo dhaweeyey hadalka wasiirka Warfaafinta,isagoo balanqaaday in warbaahinta labada dal ay si dhow uga wada shaqeeyaan horumarinta iyo ilaalinta danaha labada Dal ee Soomaaliya iyo Shiinaha, wuxuuna ballan-qaaday in uu kordhinayo deeqaha waxbarasho oo ay siiyaan wasaaradda Warfaafinta gaar ahaanna shaqaalaha Warbaahinta.

                                                       

 

 

La wadaag cid kale