Manchester(SONNA)- Macalinka kooxda kubadda cagta Manchester United ee Ole Gunnar Solskjær ayaa si weyn u ammaanay qaab ciyaareedka naadiga uu hoggaamiyo dhigiisa Jürgen Klopp ee Liverpool xilli ciyaareedkan.
Ole Gunnar Solskjær ayaa ku tilmaamay Liverpool inay tahay kooxda ugu fiican xilli ciyaareedkan ee horyaalka Premier League, xilli labada kooxood ay caawa ku balansan yihiin inay wada ciyaaraan.
Kooxda kubadda cagta Liverpool ayaa caawa oo Axada ku soo dhaweyn doonto garoonkeeda Anfield naadiga ay xilfaltamaan ee Manchester United, si ay u wada ciyaaraan kulan ka tiran kulamada 23-aad ee horyaalka Premier League.
Haddaba wargeyska “The Guardian” ayaa soo xigtay wareysi uu bixiyay macalin Ole Gunnar Solskjær kahor ciyaarta caawa ka dhici doonto garoonka Anfield, waxaana hadaladiisa ka mid ahaa:
“Waxaan jeclaan lahaa inaan noqdo qofkii ugu horreeyay ee qira in Jürgen Klopp uu shaqo weyn ka qabtay kooxda Liverpool”.
“Haddii aad fiiriso Liverpool haatan, waxay guuleysteen 33 kulan, waxayna bar-bardhac galeen 5 kulan, 38-kii kulan ee ugu danbeysay ay ka ciyaareen horyaalka Premier League, waxay qabanayaan shaqo fiican”.
“Waxay ku guuleysan karaan saddex koob xilli ciyaareedkan, aan aragno waxa ay ku guuleysan doonaan bisha May, waxay ciyaari doonaan kulamo badan ee aad u adag”.
“Kulankii ugu dambeeyay ee aan la ciyaarnay Liverpool, waxay ahaayeen kuwa ugu sareeya ee horyaalka, anagana waxaan hal dhibac u jirnay saddexda hoose, waxay u qalmeen ciyaartoyda inay dareemaan cadaadiska, taasoo aan dhicin, si ay arrinta wax uga qabtaan”.
“Waxaan hadda qabnaa kalsooni badan, tani waa waxa aan u baahanahay, maxaa yeelay ku ciyaarista garoonka Anfield waxay u baahan tahay geesinimo”.
