Muqdisho.(SONNA):- Ciidamada ammaanka Soomaaliya ayaa howlgal culus ku qaaday goob ay isku uruursanayeen maleeshiyaad ka tirsan Khawaarijta Al-shabaab oo meelo kala duwan laga keennay.
Waxaana loo abaabuli rabay qaadidda weeraro ay doonayeen in ay ku dhibaateeyaan shacabka Soomaaliyeed.
Hay’adaha ammaanka oo garabka helayay shacabka ayaa helay xogtan ku aaddan is uruursiga maleeshiyada Khawaarijta, intaas ka dib waxay qaadeen howlgal aad loo qorsheeyay lagana digtoonaa in ay dhibaato ka soo gaarto Bulshada.
Halka ay isku uruursanayeen maleeshiyaadka Khawaarijta ah ayaa ah meel bannaanka ka ah degmada Awdheegle ee gobolka Shabeellaha hoose.
Howlgalkan ay ciidamadu ku qaadeen deegaankan ay ku sugnaayeen Khawaarijta waxaa ka dhashay khasaaro isugu jira dhimasho dhaawac oo soo gaaray argagixisadii dhagarta maleegayay.
Maleeshiyada Al-shabaab ee lagu qaaday howlgalka afjarka ah waxaa hoggaaminayay horjooge magaciisa lagu sheegay Salmaan Dheere, kaas oo ku-xigeen u ah horjoogaha Al-shabaab u qaabilsan gobolka Shabeellaha hoose oo magacyo badan leh sida Macallin Xaashi, Tabliiq iyo Cabdi-Kariim, intaa oo magacyo ah wuxuu ula baxay banneysiga dhiigga shacabka Soomaaliyeed.
Horjooge Salmaan Dheere oo bartilmaameedku uu ahaa,xog aan helnay waxay sheegeysaa inuu soo gaaray dhaawac culus. Waxaana la tilmaamayaa maleeshiyaadkii qaaday dhaawaciisa ay ku hayaan meel aan cusbitaal lahayn.
Ciidamada Xoogga Dalka ayaa muddooyinka waday howlgallo lagu soo afjarayo Khawaarijta Al-shabaab, kuwaas oo ka dhuumanaya caddaalada iyo gacanta ciidamada qalabka sida.
