Muqdisho.(SONNA):- Leylo Cali Xidir, waa Hooyo Soomaaliyeed oo leh lix carruur ah, Wiil iyo Shan Gabdhood, waxay ka mid tahay hooyooyinka Soomaaliyeed ee dhibaatada kala kulmay kooxda Khawaarijta Al-shabaab.
Waxay dileen saddex wiil oo la dhalatay iyo seygeeda, sanadkii 2009, hooyo Leylo Cali waxay gacanta Al-shabaab ku weysay walaalkeed ka weyn, curudkii Aabaheed iyo hooyadeed Cabdi Cali Xidir oo ay Khaawrijtu ku dileen isgoyska Bakaaraha.
“ Walllaahi wiil ila dhashay ayay dileen markii ugu horeysay,waxay ku dileen isgoyska Bakaaraha,waa waqtigii aas-aaskooda soo bilaabanayay 2009kii, bishii shanaad, wuxuu ahaa ciidankii lagu soo tababarayay itoobiya waqtigii AUN Cabdullaahi Yuusuf,”.
18-maalin ka dib, Leylo oo aysan ka bixin Murugadii walaalkeed,curudkii Aabaheed Cabdi Cali, waxaa markale soo gaartay geerida walaalkeed Siciid Cali Xidir oo ahaa oo curudkii labaad ee Aabaheed, walaalkii labaad oo ay weysay maalmo uun ka dib markii godka la geeyay Cabdi.
“ Kan xiga waa walaalkey ila dhashay da’dii iga yareyd waaye, waxaa lagu dilay Shabeellaha hoose, isagoo Dowladda u shaqeynayo oo shaqo ku jiro, waxaa lagu dilay meel Afgooye ka xageyso oo la yiraahdo Doolka,” ayay tiri hooyo Leylo.
Shan sano ka dib, Leylo ka dib geerida walaalaheed Siciid iyo Cabdi, waxa ay la kulantay xanuun kale oo aan ka liidan kuwii hore, 2014kii bishii 3-aad, xanuunkii saddexaad oo ay Leylo Cali u geysteen kooxda Khawaarijta Al-shabaab ayaa ah in ay agoon ka dhigeen wiil iyo shan gabdhood oo ay u heysay Leylo Alle ha u naxariistee Cabdi Maxamuud Xuseen oo ahaa askari ka tirsan Ciidamada Xoogga.
“ Ilmaheyga Aabahoodna waxaa la dilay 2014kii, bishii saddexaad Maarso, isagoo shaqo u sii socdo ayaa la dilay qorigana laga qaatay,wuxuu ka tirsanaa ciidamadii lagu soo tababaray Uganda, adduunyo waxaan la arkeyn malahan, waxaan dareemay xanuun aad iyo aad u badan, waxaa iigu darneyd habeenkii la soo duugay ilmahaas Aabahood, canug yar oo saddex bilood jirtaa ii joogtay,”.
Waxaa u soo xigtay xanuun kale, waxa ay weysay qof kale oo muhiim u ahaa Leylo, kaa oo wehel ay ka dhigatay markii ay weysay Alle ha u wada naxariistee walaalaheed Cabdi, Siciid iyo Seygeeda, markale, gacanta Khawaarijta waxay ku weysay Alle ha u naxariistee, Bile Cali Xidir, oo marnaba aan waligii qaadin qori, wuxuu ahaa mid u xamaala carruurtiisa iyo kuwa agoont ah ee walaashiisa Leyla, balse, Khawaarinta oo ah kuwo aanan lahayn wax naxariis ah, ayaa si bareer ah u toogtay Bile.
“ Waxaa ku soo xigay mid kale, gacantooda ayuu ku baxay isagana iyagaa dilay, Cali Kamiin ayay ku dileen, isagoo iska xamaalanayo,iska socdo askari ma ahayn, ayay beegsadeen oo ay dileen waagii madax jabiska uu jiray,”.
Leyla, saddexdii wiil ee la dhalatay Siciid, Bile, Cabdi iyo Seygeedaba markii ay weysay waxa ay ku cidlootay korinta lix carruur ah oo ay agoon ka dhigeen Khawaarijta Al-shabaab, waxayna maaliba, maalinta ka dambeysay ay la daala dhaceysay korinta carruurteeda oo ay ku cidlootay.
“ Walaahi aniga hadda hooyadeyna waa joogtaa, walaalaheyna waa joogaan, laakiin muhiimadda waa ani, anigaa u baxo, anigaana u imaado, cid kale oo hadda ay ku tiirsan yihiin noloshooda iyo waxbarashadooda hadda oo intii hore ka waa weyn yihiin cid kafaala qaaday ma jirto, aniga unbaa waxbarashadooda iyo noloshooda kale kafaala qaaday,”.
14-sano, Leyla ayaa dib ugu soo laabatay Galcad, Maqaayaddii ugu horeysay ayay ka furtay deegaankan, waa meel xusuus badan ay ku tabeyso, marnaba ma aysan ka niyad jabin, halkii ay ku dhalatay oo ay ku guursatay kuna dhasay lix carruur ah.
“ Hadda gurigeyga lix bilood ayaa ka maqanahay, Lix bilood Xamaraa deganahay, lix bilood deegaankan Galcad oo aan taaganahay kuna dhashay ayaa joogaa, 2009kii, markii wiilka ku dileen meeshan subaxii ka dambeysay ayaa baabuur ka raacay ka dib uma soo laaban, wax badan oo aan nool ayaa ku haminayay inaan Galcad mar un tago, oo anigoo caafimaad qabo aan tago,”.
Qoysas badan ayay Khawaarijtu sabab u noqotay in ay dunida ku kala fogaadaan, waana sababta qof kasta uga qoomameyn la dagaallanka Khawaarijta qowleysatada ah ee khaarijiyay ama qashay Qoysas badan oo si farxad leh dunidan ugu noolaa.
