Muqdisho.(SONNA):- Waxaa sii xoogeysanaya howlgallada ka dhanka ah kooxda Khawaarijta Al-shabaab ee ka socda gobollada Dalka, kuwaas oo lagu laayay maleeshiyaad iyo horjoogayaal muhiim u ahaa argagixisada oo qaarkood geeridooda warbaahinta laga qariyay, balse, warbaahinta qaranka ay bannaanka soo dhigtay.
Cumar Maxamed Abuu Ayaan oo ka mid ahaan jiray kooxda Al-shabaab, balse ka baxay ayaa warbaahinta qaranka u sheegay in howlgallada socda Khawaarijta looga laayay horjoogayaal dhibaatooyin badan ku hayay shacabka, aadna uga naxeen argagixisadaย geeridooda iskuna dayeen in ay qariyaan.
“waxaa jira howlgalo iyo dagaalo goos goos ah oo khawaarijta looga laayey horjoogayaal dhibaatooyin badan shacabka ku haayey aadna ay uga naxeen dilkooda iskuna dayayaan iney geeridooda qariyaan”, ayuu yiri Cumar Maxamed Abuu Ayaan.
Sidoo kale, Abuu Ayaan ayaa tilmaamay in waxa Khawaarijta ku qasbaya in ay qariyaan geerida dhagar-qabayaashooda ay tahay in aysan ku socon waddo toosan oo xaq ah, kana naxayaan waddada uu ku dhintay in ay geeneyso naar.
” Waxa ay sameynayaan in aysan xaq ahayn waa ogyihiin, sidaas owgeed qof kasta oo ka dhinto waa ka murugoonayaan, sababta oo ah waxay ka naxayaan waxa uu ku dhintay iyo xaaladda uu ku jiray in ay tahay waddo naar ah in ay tahay, marka sidaas awgeed waa qarinayaan,”.
Waxaa jira horjoogayaal badan oo ay Khawaarijta laga dilay oo ay qariyeen sida horjoogayaal magacooda lagu soo koobay Naaleeye, waxaa ka mid ah horjoogayaasha ay dileen ka dibna ay qariyeen Baari oo dhanka qorsheynta ciidanka u qaabilsanaa Khawaarijta, Ibraahim Afghan oo ay dileen xitaa labo usbuuc ma maqal geeridiisa xaaskiisa iyo ehelkiisa, dilka horjooge “Anta-anta”, waa ay qariyee, sidoo kale, Camow iyo horjoogayaal badan oo qaarkood iyaga iska dilay iyo kuwa badan oo laga dilay inta badan waa ay qariyeen geeridooda.
Ciidamada Dowladda Federaalka oo kaashanaya shacabka Soomaaliyeed ayaa sii laba jibaaray howlgallada ka dhanka Khawaarijta, kuwaas oo lagu beegsanayo deegaannada fog fog ay ku dhuumaaleysanayaan, waxaana jira deegaanno iyo degmooyin badan oo hadda xor ka ah gacanta Khawaarijta.
