Muqdisho(SONNA) Munaasabadan waxaa ka soo qeyb galay mas’uuliyiin katirsan dowladda gaar ahaan Wasaaradda waxbarashada ,hiddaha iyo tacliinta sare,wasiiro,xildhibaano bahda waxbarashada, waalidiinta ardayda, mas’uuliyiinta Jaamacadda Jamhuuriya iyo marti sharaf kala duwan.
Dhamaan mas’uuliyiintii ka oscotay dowladda Soomaaliya ayaa bogaadiyay horumarka dhanka waxbarashada ah oo uu dalku ku talaabsanayo,iyagoo ardayda qalinbedelatayna ku booriyay in waxbarashadooda ay sii laba jibaaraan si ay dalkoodi hooyo iyo dadkoodi wax ugu taraan,waxaana kamid ah wasiiru dowlaha wasaaradda Waxbarashada Soomaaliya mudane Cabdiraxmaan Maxamuud Cabdulle(Jaabiri)
Agaasimaha waaxda tacliinta sare ee wasaaradda waxbarashada ,hiddaha iyo tacliinta sare oo munaasabadda ka hadlay ayaa u hambalyeeyey ardayda maanta ka qalin jabisay, waxaana ardayda uu ku booriyay in ay sii wataan waxbarashada ilaa heerar kale la gaaraan.
Guddoomiyaha Jaamacadda Jamhuuriya Eng Mohamed Axmed Maxamuud oo isna hadal ka jeediyay munaasabada ayaa hambalyo iyo boggaadin u diray ardayda sanadkan ka qalin jabisay Kuliyaddaha kala duwan ee Jaamacadda Jamhuuriya.
Waxaa uu sheegay Guddoomniyaha Jaamacadda in ardayda maanta qalin jabisay kuliyaddaha kala duwan ee Jaamacadda ay usoo dhabar adeegeen waxbarashada , isagoo kula dardaarmay inay waxbarashada halkeeda ka sii wataan uguna adeegaan dadkooda.
Qaar ka mid ah arday maanta xafladooda qalin jabinta loo dabaal dagayey ayaa dhankooda muujiyey dareenkooda farxadeed ee ku aadan in ay shahaadada heerka koowaad ee digriiga ka qaataan Jaamacadda Jamhuuriya iyaga oo u mahadceliyey waalidiintooda iyo macalimiintoodii u soo dhabar adeegay mudadii ay waxbarashada soo wadeen.
Jaamacadda Jamhuuriya oo ka mid ah Jaamacadaha ugu tayada badan ee ku yaala dalka ayaa waxaa ka qalin jabisay dufcadii afaraad , waxaana Jaamacadan dadaal badan ku bixisaa soo saarista aqoonyahano bulshada Soomaaliyeed wax tar badan u leh.
