Muqdisho.(SONNA):- Waxabarashu waa furaha horumarka bulsho. Waddan kasta oo aduunka horumar gaaray, waxbarasho tayo leh ayuu ku gaaray. Haddii si kale loo dhigo, waxbarasho aan dhidibo adag ku taagnayn, waa meesha ugu horaysa oo ay Ummadi, Qaran ama Dawladi ka bur-burto, sidaa darteed, nidaamka waxbarasho ee hagaagsani wuxuu marwalba horseedaa horumar.
Iyadoo, taas laga duulayo, Wasaaradda Waxbarashada, Hiddaha iyo Tacliinta sare ee Xukuumadda federaalka Soomaaliya ayaa diyaarisay qorshe lagu tayeynayo waxbarashada sare ee dalkeenna ( Jaamacadaha) oo ay dhawaan wasaaradda u gudbin doonto golaha wasiirada.
“ Arrinta ku saabsan waxbarashada sare oo marka su’aalo ay ka imaan doonaan sida aan rajeynayo, Jaamacadahan maxay u bateen?, Yaa hubiya?, Maxay soo saaraan?, runtii waa su’aalo adag oo inoo yaalo, wasaaraddu waxay diyaarisay qorshe iyo mashruuc loo gudbinayo dhawaan golaha wasiirada oo ansixin doono sida la doonayo in tayada waxbarashada sare ee dalkeenna loo maamulo, oo loo hagaajiyo oo sare loo qaado, marka waxaan rajeyneynaa in todobaadyada soo socda isbedel uu muuqan doono haddii Alle yiraahdo,” ayuu yiri wasiirka waxbarashada XFS Faarax Sh. C/qaadir.
Sidoo kale, Wasiirka ayaa rajo wanaagsan ka muujiyay in ay jiraan kumannaan ama malaayiin da’yar Soomaaliyeed doonaya in ay dalka iyo dadka Soomaaliyeed wax weyn ku soo kordhiyaan haddii ay helaan waxbarasho tayo sare leh iyo dowlad arrintaas ka gacan siisa.
Wasiir Faarax Sh. Cabdiqaadir, ayaa tilmaamay in todobaadyada soo socda ay qaadayaan tallaabo ay ku hagaajinayaan Buugaagta waxbarasho iyo Manaahijta, taas oo qeyb ka ah talaaboyinka fiican ee lagu hagaajinayo waxbarashada Dalka.
“ Arrinta ku saabsan buugaagta waxbarashada iyo Manhajka, waa tallaabada ku soo xigto tallaabada macallimiinta. Tallaabadii koowaad waxaan u qaadnay imtixaanka iyo Shahaadada, tallaabada labaad waxaan u qaadnay macalinka, tallaabada saddexaadna waxaan u qaadeynaa buugga ardaygu wax ku barto, waxaanna Insha Allah rajeyneynaa inaan ku guuleysano,” .
Sannadihii ugu dabeeyay, Soomaliya waxay sameyneysay horumarka dhanka waxbarashada Dalka ah. Wasaaradda waxbarashada, Hiddaha iyo Tacliinta Sare ee Xukuumadda Federaalka Soomaaliya oo fulinaysa amarka Madaxweynaha JFS Mudane Xasan Sheekh Maxamuud, sidoo kalena gudanaysa waajibaadkeeda dastuuriga ah ee baahinta waxbarashada aas-aasiga ah si ubad kasta oo Sooomaaliyeed ee gaaray da’da waxbarashada u helaa waxbarasho tayo leh oo lacag la’aan ah ayaa wasaaraaddu waxaa ay daah furtay hannaanka lagu shaqaaleysiinayo 3000 macallin oo ka hawlgeli doona Dowlad goboleedyada iyo gobolka Banadir.
Wasiirka wasaaradda waxbarashadda, Hiddaha iyo Tacliinta sare ee Xukuumadda Federaalka Soomaaliya Mudan Faarax Sheekh Cabduqaadir oo ka hadlay munaasabadda lagu daahfurayay hanaanka qaadashada mucalimiinta ayaa is dul taagay hannaanka iyo habraaca loo marayo shaqaaleysiinta 3000 ee macallin, waxaana uu tilmaamay in la raacayo hannaan wasaaraddu dajisay oo cadaalad ah, una siman dhamman Ummadda Soomaaliyeed.
