Ankara (SONNA): Xafiiska Hantidhowrka Guud ee JFS iyo Maxkamadda Xisaabaadka Turkiga ayaa si wadajir ah magaalada Ankara ee dalka Turkiga uga furay tababar aqoon is-weydaarsi ah oo ku saabsan baarista u hoggaansanaanta Sharciga.
Tababarkan waxaa ka qaybgalaya hawl-wadeeno ka socda Xafiiska Hantidhowrka Guud ee JFS iyo Xafiisyada Hantidhowrka Guud ee dowlad goboleedyada dalka.
Ku-xigeenka Hawlaha Baarista ee Maxkamadda Xisaabaadka Turkiga, Mudane Ahmet Tezcan, oo ka hadlay munaasabadda furitaanka tababarka ayaa sheegay in hay’addiisu mar walba diyaar u tahay sii wadista taageerada iyo garab istaagga Xafiiska Hantidhowrka Guud ee JFS, gaar ahaan dhinacyada la xiriira horumarinta aqoonta, xirfadaha iyo iskaashiga mihnadeed.
Dhankiisa, Ku xigeenka Hantidhowraha Guud ee JFS mudane Cabdijamaal Ismaaciil Maxamed, ayaa uga mahadceliyey Maxkamadda Xisaabaadka Turkiga martigelinta tababarkan iyo iskaashiga joogtada ah ee ay la leeyihiin Xafiiska, isaga oo xusay in fursadaha noocan ahi ay xoojinayaan aqoonta, tayada hawl-fulinta iyo is-dhaafsiga waaya-aragnimada mihnadeed.
Tababarkan waxa uu qayb ka yahay dadaallada lagu kobcinayo aqoonta iyo xirfadaha hawl-wadeennada hantidhowrka ee heerarka kala duwan ee dowladda, heer Federaal iyo heer Dowlad Goboleed, iyada oo Xafiiska Hantidhowrka Guud ee JFS uu si madax-bannaan u gudanayo waajibaadkiisa dastuuriga ah iyo kuwa sharciyeed, kuna shaqeynayo mabaadi’da isla xisaabtanka, hufnaanta iyo daah-furnaanta.
