Garoowe (SONNA): Hay’ada naafada Qaranka oo kaashanaysa daladda naafada Puntland ayaa Garoowe ku qabtay kulan ku saabsan xog uruurinta naafada dalka oo laga samaynayo dalka oo dhan.
Kulankan waxa ka soo qayb galay agaasimaha guud ee wasaarada haweenka iyo arrimaha qoyska Puntland gudoomiyaha daladda naafada Puntland, waxaana goob joog ka ahaa xoghayaha hay’ada naafada Qaranka, xogyaha ururka saxafiyiinta Puntland ee Map iyo ku xigeenka daladda ururada bulshada rayidka ah ee Puntland.
Ugu horrayn waxa munaasabadda ka hadlay xoghayaaha hay’ada naafada Qaran Hodan Cali Cabdiraxmaan oo faahfaahin guud ka bixiyey muhiimada ay leedahay helida iyo uruurinta xogta naafada dalka tilmaamtayna in xog uruurintan ay hay’addu ka samayanyso dowlad goboleedeedyada dalka.
Dhankiisana gudoomiyaha daladda naafada Puntland ayaa sheegay in xogtan ay noqoyso mid ka qayb ka qaadata horumarka naafada dalka, ayna fursad muhiim ah u tahay dadka baahiyaha gaarka ah qaba ee ku nool Puntland iyo dalka intiisa kale.
Madaxda ururadii ka soo qayb kulankan ayaa dhankooda tilmaamay in loo baahan yahay in la hormariyo naafada wadanka iyo dadka baahiyaha gaarka ah qaba ayna yihiin dad nugul oo mar walba u baahan caaawinaad joogta ah.
Gagabadii agaasimaha guud ee wasaarada haweenka Puntland oo ka hadlay shirkan ayaa Bogaadiyey dadaalka wax u qabadka naafada Soomaaliyeed ee ay hormuudka ka tahay hay’ada naafada Qaranka kula dardaarmay in si dhab ah loo sameeyo xog aruurintan oo tixraac u noqon doonta wax u qabadka dadka baahiyaha gaarka ah qaba ee ku nool dalka oo dhan.
