Muqdisho,(SONNA):- Horjoogayaasha Khawaarijta Al-shabaab oo muddooyinkii u dambeeyay sii xoogeysteen howlgallada gaarka ah deegaannada ay ku sugan yihiin,islamarkaanna ifka looga qariyay horjoogayaal iyo maleeshiyaad dhowr ah oo gudaha Khawaarijta saameyn ku lahaa ayaa waxaa sii xoogeystay cabsida iyo kala shakiga soo kala dhex galay horjoogayaasha dhexdooda, taas oo ka dhalatay howlgallada gaarka ah.
Horjoogayaasha awoodda leh ee Al-shabaab oo tuhmaya in howlgallada gaarka ah lagu beegsanayo ay ku lug leeyihiin, xogahoodana ay gudbiyeen horjoogayaal dhexe iyo kuwo hoose oo maleeshiyada Al-shabaab daacad u ahaa ayaa saacadihii la soo dhaafay ku xir xiray deegaanno iyo degmooyin ka tirsan gobollada Jubbooyinka ,Shabeellaha Dhexe, Baay iyo Bakool horjoogayaal iyo maleeshiyaad kooxda gudaheeda ka tirsanaa oo ay tuhmeen in xogahooda ay bixiyeen.
Magaalooyinka horjoogayaasha lagu xir xiray waxaa ka mid ah Bu’aale,Saakow,Buur Fuulaay, Kuunya Barow iyo Ceelbuur.
Waxaa magaalooyinkaas horjoogayaasha lagu xir xiray oo dhammaantood deegaannadaas lagu xiray aan ka soo jeedin kana soo jeedo deegaanno kale loo aaneeyay in ay mas’uul ka yihiin hagidda howlgallada gaarka ah.
Degmada Ceelbuur ee gobolka Galgaduud waxaa lagu xiray horjoogayaal dhexe iyo kuwo hoose oo aan gobolka Galgaduud ka soo jeedin, waxaanna amarka lagu xiray lahaa horjoogayaal ka soo jeeda degmada Ceelbuur.
Deegaannada kale iyo degmooyinka kala ah Bu’aale, Saakow iyo Buula Fulaay waxaa kagu xir xiray horjoogayaal iyo maleeshiyaad ka tirsan Khawaarijta Al-shabaab, kuwaas oo lagu eedeeyay in ay iyagu bixiyeen xogaha hagay howlgallada gaarka ah ee ciidamada Dowladda Federaalka, kuwaas oo lagu naafeeyay Khwaarijta Al-shabaab.
Howlgallada gaarka ah ee ka dhanka ah Khawaarijta oo maalmihii dambeeyay soo xoogeystay ayaa sababay in may horjoogayaasha iyo maleeshiyada Al-shabaab ku dhuumaaleystaan dhulalka howdka ah, kuwaas oo horjoogayaasha iyo maleeshiyada qaar ku qasbay in ay bixiyaan xogaha Khawaarijta si ay iyagu u badbaadaan.
Sidoo kale, horjoogayaasha Al-shabaab ayaa bilaabay in ay ka aag-beddeshaan deegaannada muddooyinkii la soo dhaafay ay joogeen, waxaanna ka mid ah deegaanno dhaca Shabeellaha hoose gaar ahaan deegaanka Kunji oo dhaca inta u dhaxeyso deegaannada Mubaarak iyo Jannaale oo ka tirsan gobolka Shabeellaha hoose.
Howlgallada gaarka ah ee laga fuliyay qaar ka mid ah gobollada Dalka waxay Al-shabaab ku waayeen horjoogayaal iyo maleeshiyaad saameyn ku lahaa gudaha argagixisada.
