Muqdisho(SONNA);-Guddiga Arrimaha Dibadda iyo xiriirka Caalamiga ah ee Golaha Shacabka Baarlamaanka Jamhuuriyadda Federaalka Soomaaliya ayaa xafiiskiisa xarunta Guddoonka iyo Guddiyadda ee Villa Hargeysa kulan kula qaatay Safiirka Sweden u fadhiya Soomaaliya H.E. Joachim Waern,waxaana kulanka shir guddoominayay Guddoomiyaha Guddiga Xildhibaan Maxamed Jaamac Mursal oo ay wehliyaan Guddoomiye kuxigeenka guddiga Xildhibaam Aweys Xuseen Macalin Xoghayaha Guddiga Xildhibaan Sayid Cali Isaaq Maxamed.
Kulanka ayaa looga hadlay xoojinta xiriirka iyo iskaashiga ka dhexeeya wadamada Soomaaliya iyo Sweden gaar ahaan Baarlamaanadda labada dal taasi oo loo marayo hanaan wada shaqeyn oo dhex mara Guddiyadda Arrimaha Dibadda ee labada Baarlamaan,waxaana Danjire Waern dhankiisa uu muujiyay sida ay Sweden uga go’an tahay inay taageerto horumarka Soomaaliya ee dhinacyada nabadda, xasilloonida iyo sidoo kale horumarka waara.
