Muqdisho(SONNA)-Waxaa galabta lagu wadaa tuulada ciyaaraha ee Stadium Muqdisho in lagu soo gabagabeeyo tartanka ciyaaraha ee maamul gobaleedyada dalka iyo gobolka Banaadir, kaas oo ay finalka wada ciyaari doonaan xulalka kala matalaya dowlad gobaleedyada Galmudug iyo Hirshabeelle.
Ciyaarta u dhaxeysa labadaan koox ayaa aad ugu duwan kuwa kale, waxaana la arkayey subaxnimadii hore ee saaka in qaar ka mid taageerayaasha ay aroor hore iska xaadiriyeen garoonka laga baasan doona ciyaarta galabta marka ay goorsheegtadu tahay 3:00 PM.
Diyaar garow xooggan ayaa laga dareemayaa labada xul ee isku fara saari doona finalaha koobka ciyaaraha ee maamul gobaleedyada dalka iyo gobolka Banaadir, iyada oo xusid mudan tahay in baraha bulshada laga dareemay taageerayaasha labada dhinac.
Labada koox ee finalka wada ciyaara ayaa ka soo kala adkaaday xulalka gobalka Banaadir oo 2020-kii ku guuleystay koobkaan xilli uu martigalinaya koobka iyo xulka Jubbaland oo guuleystay 2017-kii.
Marka la eego labada koox ee finalka wada jooga, Galmudug waa markeedii labaad oo xiriir ah ay finaalka timaado, waxa ay sidaan oo kale finaalka timaaday 2020 oo laga qaaday koobka, halka xulka maamul gobaleedka Hirshabeelle uu finalka imaaday markii ugu horreysay.
Ammaanka garoonka ayaa aad loo adkeeyey, Wasaaradda dhallinyarada iyo Ciyaaraha Xukuumadda Federaalka Soomaaliya iyo Xiriirka Kubadda Cagta ayaa taageerayaasha ugu baaqay in ay illaaliyaan nidaamka garoonka, iyada oo loogu digay in aysan sameen rabshado.
