Muqdisho,(SONNA): Waxaa maanta si rasmi ah isku diiwaangeliyey xarunta Guddiga Doorashooyinka ee magaalada Baydhabo laba kamid ah mas’uuliyiinta sare ee dowladda.
Wasiir ku-xigeenka Arrimaha Dibadda Dowladda Federaalka Soomaaliya, Md. Isaaq Maxamuud Mursal, iyo Wasiir ku-xigeenka Qorsheynta Dowladda Koonfur Galbeed Soomaaliya, Md. Maxamed Aadan Maxamed ayaa ka mid ah mas’uuliyiinta isdiiwaangeliyay.
Mas’uuliyiintan ayaa muujiyay muhiimadda ay leedahay ka qeybgalka nidaamka doorashada, iyagoo ugu baaqay shacabka Soomaaliyeed gaar ahaan reer Koonfur Galbeed in ay si buuxda uga qeybqaataan is-diiwaangelinta, taas oo ah tallaabada koowaad ee xaqiijinta codka muwaadinka.
Wasiir Isaaq Maxamuud Mursal ayaa sheegay in is-diiwaangelintu tahay xuquuq dastuuri ah, halka Wasiir Maxamed Aadan Maxamed uu xusay in codka qof walba uu yahay awoodda lagu dhisayo mustaqbalka dalka.
Guddiga Doorashooyinka ayaa ku howlan sidii ay u xaqiijin lahaayeen in nidaamka is-diiwaangelintu u socdo si hufan, nabad ah, kuna dhisan kalsooni.
Baydhabo waa cod. Diiwaangeli si aad codkaaga u dhiibato.
