Muqdisho,( SONNA):- Wasiirka Awqaafta iyo Arrimaha islaamka Xukuumada Jamhuuriyadda Federaalka Soomaaliya Mudane Sheekh Mukhtar Roobow Cali ayaa xafiiskiisa magaalada Muqdisho ku qaabilay wafdi heer sare ah oo ka socdey Hay,adda DIYANET-ka ee Dalka Turkuye.
Kulankan oo ka dhacay xafiiska wasiirka ayaa waxaa ku weheliyey wasiirka Ustaad Maxamed Xaaji Ibraahim iyo Yusuf Xasan Mursal oo ah la taliyaal sare oo ka tirsan Wasaaradda Awqaafta iyo Arrimaha Islaamka.
Sidoo kale dhanka Wefdiga DIYANAT ka ee kulan ka qeyb galay ayaa waxaa hoggaaminayey Mudane Axmed Akca oo ah xubin ka tirsan guddiga siyaasadda waxbarashada ee Dalka Turkuye, kana mid ah Guddiga Maamulka hayadda DIYANAT-ka, Mudane Fatih Kurt oo ka tirsan Diyanat ka, Mudane Furqan Mustafa Akcakil oo ah u qeybsanaha arrimaha waxbarashada DIYANAT ka qeybta Afrik iyo Cumar Farouk Arslan oo ah wakiil DIYANAT ka u fadhiya Soomaaliya.
Labada dhinac ayaa kulankooda diiradda ku saarey horumarinta xiriirka iyo iskaashiga ka dhaxeeya Wasaaradda Awqaafta iyo Arrimaha Islaamka Xukuumada Federaalka Soomaaliya iyo Hay,adda DIYANET- ka ee Dalka Turkuye, waxaana la isla soo qaadey sidii Wasaaradda Awqaafta iyo Arrimaha Islaamka looga taageeri lahaa dhisidda Hay,adda Waqf oo ay Soomaaliya yeelato, tababarada iyo karaan dhiska shaqaalaha wasaaradda iyo kawaadirta ka shaqeysa dhisidda waqfiga iyo in deeqaha waxbarasho ee ay bixiso DIYANAT ka looga faaideeyo ducaadda iyo dhalinyerada Soomaaliyeed ee ku guda jirta barashada culuumta Islaamka, waxeyna ugu dambeynti Wefdigu booqdeeen dhismaha Xarunta cusub ee Wasaaradda.
