Muqdisho (SONNA): Wasiirka amniga gudaha ee dowladda Federaalka Soomaaliya Jeneral Cabdullaahi Sheekh Ismaaciil (Fartaag), Wasiirka gaashaandhigga mudane Axmed Macallin Fiqi, Taliyaha Ciidanka Booliska Soomaaliyeed iyo Danjiraha Turkiga u fadhiya Soomaaliya ayaa maanta ka qaybgalay munaasabad si heer sare ah loo soo agaasimay oo lagu xusayay sanad guuradii 9-aad ee ka soo wareegtay afgembigii dhicisoobay ee Turkiga sanadkii 2016.
Munaasabaddan oo lagu qabtay Xarunta Aqoonta Ciidanka Booliska Soomaaliyeed ayaa sidoo kale lagu daahfuray Iskuulka Luuqadda Turkiga oo si rasmi ah loogu kordhiyay xarunta, si kor loogu qaado xirfadda luuqadeed ee ciidamada, loona xoojiyo xiriirka iskaashi ee Soomaaliya iyo Turkiga.
Wasiir Fartaag ayaa khudbad uu halkaasi ka jeediyay ku ammaanay doorka dowladda Turkiga ee taageerada joogtada ah ee ay la garab taagan tahay Soomaaliya, gaar ahaan dhismaha iyo tayeynta hay’adaha amniga. Waxa uu intaas ku daray in iskuulkan cusub uu fursad weyn u yahay ciidamada Booliska Soomaaliyeed si ay u bartaan luuqadda Turkiga, taasoo sare u qaadi doonta xiriirka labada dal ee walaalaha ah.
