Safaaradda Soomaaliya ee Yugaandha oo qabatay xuska 1-da Luulyo

‎‎Kampala-(SONNA)-Safaaradda Jamhuuriyadda Federaalka Soomaaliya ee dalka Uganda ayaa markii ugu horreysay si rasmi ah u qabatay munaasabad lagu xusayo 1-da Luulyo, maalinta ay midoobeen gobollada Waqooyi iyo Koonfur ee Soomaaliya sanadkii 1960-kii, taasoo lagu aasaasay Jamhuuriyadda Soomaaliya.
‎
‎Munaasabaddan oo dhacday 1-da Luulyo 2025 ayaa ahayd tii ugu horreysay ee noocan oo kale ah lagu qabto dalka Uganda, waxaana si heer sare ah u soo qabanqaabisay safaaradda Soomaaliya oo ay horkaceyso Danjire Fardowsa Maxamed Qanyare ayaa waxaa ka soo qayb galay marti sharaf kala duwan oo ay ka mid yihiin diblomaasiyiin ka socday dalal kale, xildhibaano, madaxda bulshada Soomaaliyeed ee Uganda, ganacsato, aqoonyahanno, dhalinyaro iyo haween.
‎
‎Intii lagu guda jiray xuska, waxaa lagu soo bandhigay taariikhda halgankii gobannimo-doonka, suugaan waddani ah, ciyaaro hidde ah, iyo khudbado ay jeediyeen mas’uuliyiinta safaaradda iyo martida kale. Safiirka safaaradda Soomaaliya ee Uganda, Danjire Fardowsa Maxamed Qanyare, ayaa ka hadashay qiimaha maalintan ay u leedahay shacabka Soomaaliyeed, iyadoo hoosta ka xarriiqday muhiimadda midnimada, dowladnimada, iyo dib u dhiska qaran Soomaaliyeed oo xooggan.
‎
‎Safaaradda Jamhuuriyadda Federaalka Soomaaliya ee Uganda ayaa mar kale muujisay doorkeeda firfircoon ee ku aaddan kobcinta dhaqanka, taariikhda, iyo midnimada qaranka Soomaaliyeed. Qabashada munaasabaddan taariikhiga ah waxay ahayd tallaabo muhiim ah oo lagu xoojinayo isku-duubnida jaaliyadda Soomaaliyeed ee Uganda, laguna dhiirrigelinayo jiilka cusub in ay ilaashadaan qiimaha qarannimada iyo xasuusta maalmaha sharafta leh ee dalkooda.