Kigali-(SONNA)-Wasiir Ku-xigeenka Wasaaradda Caafimaadka Soomaaliya, Mudane Maxamed Xasan Maxamed, ayaa ka qayb galay shirweynaha caalamiga ah ee ajendaha caafimaadka Afrika (Africa Health Agenda International Conference – AHAIC 2025) oo ka dhacay magaalada Kigali ee dalka Rwanda.
Shirka ayaa diiradda lagu saaray sidii loo horumarin lahaa nidaamka caafimaadka ee Soomaaliya, iyadoo ay ka soo qeybgaleen ergo gaareysa 15,000 oo ka kala yimid daafaha adduunka isla markaana ka kala socday Wasaaraddaha Caafimaadka iyo hayโadaha caalamiga ah ee ka shaqeeya arrimaha caafimaadka.
Wasiir Kuxigeenka oo ka hadlay shirka ayaa muujiyay sida ay uga goโan tahay Soomaaliya horumarinta nidaamka caafimaadka, xoojinta iskaashiga goboleed, iyo hirgelinta daryeel caafimaad oo loo dhan yahay (UHC) marka la gaaro 2030.
Wuxuu xusay in xoojinta siyaasadaha caafimaadka ay lama huraan u tahay dhismaha nidaamyo waara oo dabooli kara baahiyaha bulshada, isagoo sidoo kale carrabka ku adkeeyay in maalgelinta shaqaalaha caafimaadka ay muhiim u tahay horumarka caafimaadka.
Sidoo kale, Wasiir Kuxigeenka ayaa tilmaamay in iskaashiga dowladda, bahwadaagta kale iyo hayโadaha caalamiga ah uu yahay furaha horumarinta caafimaadka waxa uuna sheegay la dhiso nidaamyo casri ah oo wax ka qabta baahiyaha sii kordhaya ee bulshada.
Sidoo kale, wuxuu xusay in Afrika ay doorkeeda ku leedahay goโaan-qaadashada caalamiga ah, loona baahan yahay in la xoojiyo saamaynta qaaradda ee qaab-dhiska caafimaadka adduunka.
Shirkan ayaa kusoo beegmaya xilli muhiim ah oo caqabado badan ay jiraan, balse Soomaaliya waxay si buuxda uga goโan tahay inay la shaqeyso dalalka kale ee Afrika, si loo horumariyo caafimaad loo siman yahay, loo dhan yahay, laguna dhisayo mustaqbal caafimaad oo waara.
