Muqdisho-(SONNA)-Waxaa maalintii labaad galay Shirka lix biloodlaha ah ee Isku-duwidda howlaha Caafimaadka Soomaaliya oo looga hadlayo horumarinta Caafimaadka dalkeenna.
Shirka ayaa looga dooday ajandaha ballaaran ee uu lahaa Shirka, waxaana wali socda doodaha la filayo in ay kasoo baxaan natiijooyin wax ku ool ah kuwaas oo yeelan doono ujeeddooyinka sida howl-qabadka iyo xog wadaagga ku saabsan horumarinta Caafimaadka Soomaaliya.
Kulanka waxaa maanta kusoo biiray Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliyo Dr. Cali Xaaji Aadam waxaana goob joog ka ah Agaasimaha guud ee Wasaaradda Caafimaadka Dr Guuleed Cabdijaliil, Agaasime waaxeedyada Wsaaradda Caafimaadka, Hey’addaha Caalamiga ah ee ka shaqeeya Arrimaha Caafimaadka Soomaaliya xubno sare oo ka kala socday xafiisyada kale ee Dowladda Dhaqaatiir iyo kaadiriin dhanka Caafimaadka ah.
Wasaaradda Caafimaadka iyo daryeelka bulshada Xukuumadda Federaalka ayaa hoggaaminaysa mowduuc walba waxaana lagu soo bandhigay qodobbo waawayn iyo doodo la xiriira Caafimaadka dalka si dhammaan ka qaybgalayaashu ay wax ugu biiriyaan, iyada oo ujeeddadoodu tahay in la helo isfaham cad oo la isku raacsan yahay kuna wajahan ballaarinta iyo horumarinta Caafimaadka Qaranka.
