Muqdisho.(SONNA):- Howlgalladii ugu dambeeyay ee ciidamada xoogga dalka iyo kuwa dib u xoreynta deegaanka ay ka fuliyeen gobolladda dalka sida Mudug Shabeellaha Dhexe, Hiiraan, Galgaduud iyo Shabeellada Hoose ayaa khasaaro culus lagu gaarsiiyay kooxda Khawaarijta, iyagoo ka firxaday deegaanno fara ku tiris ah oo ay ku dhuumaaleysanayeen.
Saraakiisha ciidamada xoogga dalka oo hoggaaminaya howlgalladaas ayaa warbaahinta qaranka u sheegay in dagaalladii ugu dambeeyay ee lala galo argagixisada looga dilay ku dhawaad 200-Khawaarij, kuwaas oo ay ku jiraan horjoogayaal la garanayo oo shacabka baadi jiray.
Sidoo kale Khawaarijta ayay hadda dhexdooda ka qarxay khilaaf daran ka dib markii looga adkaaday howlgallada socda, waxayna bilaabeen in ay dagaallamaan, maadama xaalka ku xumaaday.
Deegaan u dhow degmada Xarardheere ee gobolka Mudug ayay 14 xubnood isaga dileen khawaariijta, iyagoo iska dhaawacay tiro intaas ka badan, sida uu warbaahinta Qaranka u sheegay taliyaha Ciidanka lugta ee XDS.
Sidoo kale, deegaanka Shabeellow oo u dhow Qayacad ayaa duqayn iyo hawlgal ay iska kaashadeen Ciidanka Qaranka, saaxiibbada Soomaaliya iyo xoogagga deegaanku waxay ku dileen 80 dhagarqabe.
Deegaanka Cadaley oo u dhow degmada Mahaddaay ee gobolka Shabeellada dhexe ayaa sidoo kale lagu dilay 42 ka tirsanaa khawaariijta, sida noo sheegeen saraakiisha hoggaamineysa howlgalka.
Ciidanka xoogga dalka oo weerar ku qaaday Deeganka Beer-faarax oo dhaca waqooyi galbeed Degmada Xarardheere ee koonfurta Gobolka Mudug ayaa halkaas ku dilay 20 xubnood oo ka tirsanaa kooxda Khawaariijta sida uu warbaahinta Qaranka u xaqiijiyey Taliyaha Ciidanka Xoogga Dhulka Generaal Biixi.
Ciidanka xoogga dalka ayaa deegaan ku dhow Janaale oo ka tirsan gobolka Shabeellada hoose waxay ku dileen 4 xubnood oo ka tirsanaa khawaariijta.
Ciidamada xoogga dalka oo kaashanaya kuwa deegaanka iyo saaxiibada caalamiga ah ayaa Kooxda Khawaarijta Al-shabaab kala wareegay deegaanno dhowr ah oo muddo 10-sano ka badan ay dadka shacabka ah ku dhibaatayn jireen, waana goobihii ugu dambeeyay ee lagu jabiyay Khawaarinta, iyadoo loogu tegay godadkii ay ku dhuumanayeen ee gobollada Hiiraan iyo Shabeellaha dhexe.
Hawlgaladan ugu dambeeyey ayaa si xun loogu naafeeyey khawaariinta taas oo sabab u noqotay in dhexdooda is hiifaan iyagoo qaar ba qaarkooda kale ku eedaynayaan jabkooda,tan oo sabab u noqotay in kooxda khawaariijtu xayiraad saarto qaar ka mid ah horjoogayaasheeda sar sare.
