Muqdisho (SONNA)- Wasiirka wasaaradda warfaafinta xukuumadda FS mudane Cusmaan Abuukar Dubbe, agaasimaha guud ee wasaaradda iyo qaar ka mid ah agaasimayaasha waaxyaha wasaaradda ayaa ka qaybgalay munaasabad ay xilka kula wareegaysay agaasimaha waaxda qoraalada iyo Wargeyska dalka Ifraax Maxamed Cabdulkariim, taas oo lagu qabtay xarunta dhexe ee wakaaladda wararka Soomaaliyeed ee SONNA
Agaasimaha wakaaladda wararka SONNA Cali Cabdulqaadir Cali oo xilliyadii dambe uu ka tirsanaa Wargeyska dalka ayaa maamulka waaxdaasi ku wareejiyey agaasimaha cusub Ifraax Maxamed Cabdulkariim, waxaana uu xusay in wargeyska oo tallaabooyin horumarin ah lagu sameeyey uu rajeynayo inuu ku tallaabsado guulo wax ku ool ah maadaama waax gooni ah uu noqonayo.
Agaasimaha waaxda qoraalada iyo Wargeyska dalka Ifraax Maxamed Cabdulkariim ayaa munaasabadda ka sheegtay in waaxdeedu ay samayn doonto qorshayaal lagu tayeynayo wargeyska dalka, iyadoo kaashanaysa madaxda wasaaradda.
Agaasimaha guud ee wasaaradda Cabdinaasir Xuseen ayaa ka warbixiyey marxaladihii kala duwanaa ee uu soo maray wargeyska dalka, waxaana uu xusay in dadaal xooggan la galinayo sidii loo tayeyn lahaa wargeyska, loona kordhin lahaa cadadka la daabaco iyo meelaha uu gaaro.
Wasiirka wasaaradda warfaafinta xukuumadda FS mudane Cusmaan Abuukar Dubbe oo hadal ka jeediyey munaasabadda xil wareejinta ayaa balan qaaday in waxqabad muuqda wasaaraddu ka samaynayo horumarinta waaxda qoraalada iyo wargeyska, waxaana uu sheegay in magaca wargeysku noqon doono (Ileyska dalka), kaas oo uu dhawaan ku soo bixi doono.
