MUQDISHO-(SONNA)-Munaasabaddan ay ka soo qeyb galeen Wasiirka warfaafinta XFS, Agaasimaha guud ee Wasaaradda warfaafinta, Agaasimaha guud ee Wasaaradda haweenka, Agaasimaha hab-maamuuska Madaxtooyadda Qaranka, Agaasimaha shaqaalaha iyo tababarada Warfaafinta, Agaasimaha warfaafinta gobolka Banaadir, Ururada Saxaafadda iyo mas’uuliyiin kale ayaa waxaa xilka kula kala wareegayay agaasimaha cusub ee Telefishinka Qaranka Soomaaliyeed iyo agaasimihii hore Telefishinka
Xil wareejintaan oo ka dhacday xarunta wasaaradda warfaafinta ayaa ugu horreyn waxaa ka hadlay Agaasimaha guud ee Wasaaradda warfaafinta Dhaqanka iyo dalxiiska xukuumadda Soomaaliya mudane Abdinaasir Xuseen wuxuuna sheegay in agaasimaha cusub iyo agaasimihii hore ee Telefishinka Qaranka Soomaaliyeed inay yihiin labo Agaasime oo ay ku barteen karti iyo aqoon.
Agaasimihii hore ee Telefishinka, Faarax Salaad Dharaar ayaa sheegay in wax badan ay u qabsoomeen muddadii uu joogay xafiiska, isagoona agaasimaha cusub u rajeeyay in uu alle ku guuleeyo mas’uuliyadda cusub ee loo igmaday.
Agaasimaha cusub ee Telefishinka Qaranka mudane, Sharmaarke Maxamed Warsame ayaa agaasimihii hore uga mahadceliyay dadaalladiisi uu Qaranka ugu soo shaqeeyay, wuxuuna tilmaamay inuu halkaas kasii wadi doono shaqada Qaran ee loo igmaday.
Wasiirka Wasaaradda warfaafinta xukuumadda federaalka Soomaaliya Mudane, Cismaan Abuukar Dubbe ayaa agaasimihii hore ee Telefishinka ku boggaadiyay shaqadi uu qabtay muddadii uu joogay xafiiska, isagoona agaasimaha cusub Telefishinka Qaranka iyo ku xigeenkiisa u rajeeyay in Alle ku guuleeyo howsha loo igmaday ee ah in ay Qaranka u adeegaan.
“Warbaahinta Qaranka shaqadeedu waa isku xir shacabka iyo dowladooda, waa in shacabka la gaarsiiyaa warka dowladda iyo waxaa ay ugu maqan tahay. Saxaafadda Qaranku waxaan rabnaa inay noqoto tan hoggaaminaysa Saxaafadda dalka, tan wacyigalinaysa dadka iyo tan dadka jihaynaysa” ayuu yiri Wasiirka Wasaaradda warfaafinta Mudane, Cismaan Abuukar Dubbe.
