Muqdisho (SONNA)-Garoonka Eng Yariisow Stadium Ex Banaadir ayaa maanta lagu wada in laga daaro shumaca tartanka xiisaha badan koobka General Daa’uud ee fasal ciyaareedkan.
Koobka General Daa’uud ayaa ah mid aad u fac weyn, maadaama waqti dheer la dheeli jiray, kuna darso kooxda ugu guulaha badan waa naadiga Jeenyo uu ku guuleysatay 7-jeer koobkan, waxaana ugu dambeysay sanadkii 2014-kii.
Caadiyan koobka General Daa’uud waxaa ka qeyb galaya illaa 16-kooxood oo kala duwan kuwaasoo ka dheela horyaallada heerka koowad iyo heerka labaad ee Soomaaliya.
Kooxda kubadda cagta Muqdisho City Club waa kooxda difaacaneysa koobkan, iyadoo sanadkii la soo dhaafay ku guuleysatay xilli ay ka qaatay naadiga cawo iyo maalin ee Horseed.
Ciyaarta koowad ayaa lagu wada in lagu daah furo kooxaha Gaadiidka iyo Badbaado oo ku wada jira Group A.
Labadan kooxood ayaana nasiib u yeeshay inay ciyaaraan kulanka koowad ee tartanka General Daa’uud.
Naadiga Gaadiidka waa koox ka ciyaarta horyaalka heerka koowaad ee Somali Premier League, halka naadiga Badbaado ay ka dheesho horyaalka heerka labaad ee dalka.
Haddaba Group-kan A waxaa labadaan kooxood ee Gaadiidka iyo Badbaado ku wehliya kooxaha Geeska Africa iyo Batroolka.
Ogeysiis Kulanka:-
Tartanka: General Daa’uud
Kooxaha: Gaadiidka vs Badbaado
Garoonka: Eng Yariisow
Saacadda: 3:30 Galabnimo
