Muqdisho(SONNA);-Ku simaha Wasiirka Ahna Wasir Dowlaha Wasaaradda Caafimaadka iyo Daryeelka Bulshada XFS, Dr. Maryama Mohamed Hussein, ayaa ka qayb gashay munaasabada sanad guradda 57-sano ee aas-aaska Isbitaalka Madina oo ka mid ah xarumaha caafimaad ee lafdhabarka u ah bulshada Soomaaliyeed
Munaasabadda ayaa ahayd mid lagu soo bandhigayay guulaha iyo horumarada isbitaalka sidookale mar xaladihii kala duwanaa uu soomaray waxaana goob joog ku ahayeen Xildhibaano labada aqal, uruka dhakhaatiirta Somaaliyeed, Saraakiil booliska Soomaaliyeed iyo marti sharaf kale.
Dr. Maryama Wasir Dowlaha Wasaaradda Caafimaadka ahna ku simaha Wasiirka ayaa ugu horayn u hambalyaysay dhammaan maamulka iyo howl-wadeenada isbitaalka, iyadoo ku boorisay inay sii wadaan dadaalkooda si ay u gaarsiin lahaayeen adeeg caafimaad oo tayo leh. Waxay sidoo kale tilmaantay in shaqaalaha isbitaalka ay yihiin laf-dhabarka adeegyada caafimaad ayna Wasaaradda marwalba garab u tahay si ay ugu gutaan waajibaadkooda si hufan.
Ugu dambeyn, munaasabadda ayaa lagu gudoonsiiyay shahaadooyin iyo abaalmarino hormuudka iyo qaar ka mid ah shaqaalaha isbitaalka oo muujiyey howlkarnimo iyo dedaalka ay u muujiyeen bulshada.
