Muqdisho (SONNA)-Munaasabado lagu weyneynayo xuska 1-da Luulyo oo ku beeagn 61- guuradii ka soo wareegtay markii Gobollada Koonfureed ay xornimada ka qaateen gumeystihii Talyaaniga 1-da Luulyo sanadkii 1960-kii iyo israacii gobollada Waqooyi iyo Koonfur ayaa ka socoto Muqdisho iyo Gobollada kale ee dalka.
Suxufiinta Warbaahinta Qaranka oo ku kala sugan goobaha ay ka dheceyso xafladaha ayaa ku soo waramaya in goobaha ay munaasabadda iminka ka socoto ay ka midtahy fagaaraha daljirka Dahsoon ee Degmada Boondheere oo ay soo buux dhaafiyeen dadweyne aad u fara badan oo ka kala yimid degmooyinka Gobolka Banaadir, kuwaasi oo sita calanka Soomaaliya.
Magaalada Gaalkacyo ee xarunta Gobolka Mudug waxaa ka socoto xafladda 1-da Luulyo, halkaasi oo ay ku suganyihiin madax ka tirsan Dowlad goboleedka Galmudug, Maamulka Gobolka, kan degmada Gaalkacyo iyo qeybaha bulshada ee magaalada ku dhaqan, waxaana xafladda soo buux dhaafiyay dadweyne sita calanka Soomaaliya iyo halka kuwa kalena ay wajiyada ku xardheen calanka, taasi oo muujineysa sida ay bulshada ugu weyntahay xuska todobaadka xoriyadda.
Magaalada Beladweyne ee xarunta Gobolka Hiiraan waxaa iyana ka socoto munaasabad tan la mid ah oo ay ka qeyb galayaan Madaxweyne ku-xigeenka dowlad Goboleedka Hirshabeelle Mudane Yuusuf Axmed Hagar (Yuusuf Dabageed), Guddoomiye ku-xigeenka koowaad ee Baarlamaanka Hirshabeelle Mudane Siraaji Sheekh Isxaaq, xuno kale oo ka tirsan labada gole ee Dowlad Goboleedka Hirshabeelle iyo dadweyne aad u fara badan, kuwaasi oo u taagan weyneynta maalinta qiimaha badan leh ee 1-da Luulyo.
Magaalada Baydhabo ee xarunta Gobolka Baay, isla markaana ah xarunta KMG ah ee dowlad Goboleedka Koonfur Galbeed ayaa waxaa ka socoto munaasabad si heer sare ah loo soo agaasimay oo uu ka qeybgalay Madaxweynaha Koonfur Galbeed Mudane Cabdicasiis Xasan Maxamed (Lafta gareen), mas’uuliyiin kale oo ka tirsan Maamulka, fanaaniin, saraakiil ciidan iyo dadweyne aad u fara badan, waxaana madasha ka hadli doono mas’uuliyiin kala duwanm, kuwaasi oo ka sheekeynaya taariikhda iyo halgankii loo soo maray xornimada dalka.
Guud ahaan waxaa si aad ah loo adkeeyay amniga goobaha ay ka socdaan xafladaha lagu weyneynayo xuska 1-da Luulyo oo ah markii Gobollada Koonfureed ay xornimada ka qaateen gumeystihii Talyaaniga iyo midowgii Gobollada Koonfur iyo Waqooyi.
