Muqdisho (SONNA): Wasiiru dowlaha Wasaaradda Qoyska iyo horumarinta Xuquuqul Insaanka XFS mudane Maxamed Cusmaan Naastaro oo uu wehliyo Agaasimaha Guud Maxamed Bashir Cumar, ayaa maanta ka qeyb galay xuska Maalinta Caalamiga ah ee Naafada.
Xuskan ayaa waxaa kasoo qeyb galay wakiillo ka kala socda Dowlad Goboleedyada, saaxiibbada caalamka, hay’adaha Qaramada Midoobay, iyo Ururrada Dadka Naafada ah.
Wasiiru Dowlaha oo hadal-jeedin sameeyay ayaa dib u xaqiijiyay sida ay Dowladda uga go’an tahay ilaalinta karaamada, xuquuqda, iyo ka qeybgalka dhameystiran ee dadka naafada ah ee dhammaan qeybaha kala duwan ee bulshada.
Wuxuuna si adag u sheegay in “ka qeybgelinta dadka naafada ah aysan ahayn arrin samafal, balse ay tahay arrin la xiriirta xuquuq, caddaalad, iyo horumarka qaranka.”
Mudane Nastaaro ayaa bogaadiyay Hay’adda Naafada Qaranka, wuxuuna qiray u doodista xooggan ee ay wadaan ururrada naafada iyo haldoorka bulshada ee sii wada dadaallada lagu gaarayo Soomaaliya loo dhan yahay.
Wasaaradda ayaa iftiimisay shaqada socota ee lagu xoojinayo siyaasadaha, horumarinta isku-xirka, iyo xaqiijinta in arrimaha naafada si buuxda loogu daro qorshaha qaranka, adeegyada dowladda, iyo barnaamijyada horumarinta iyo gargaarka.
Isagoo xusay caqabadaha weli taagan gaar ahaan helitaanka waxbarashada, caafimaadka, nolol-maalmeedka, qalabka caawimaadda, iyo ilaalinta ayuu Wasiiru Dowluhu ugu baaqay dhammaan dhinacyada ay khuseyso inay cusbooneysiiyaan ballanqaadkooda ku aaddan sare u qaadista adeegyada la heli karo, ballaarinta fursadaha, la dagaallanka takoorka, iyo xoojinta nidaamyada ilaalinta.
Ka qeybgalintu waa waajib qaran. Soomaaliya waxay horay u soconeysaa marka dadka naafada ah si buuxda loo awood-siiyo inay ka qeyb qaataan oo ay horumaraan waa hal ku dhigga Wasaaradda ee lagu soo bandhigay Munaasabado badan oo sanadkan ay Wasaaradda Qoyska iyo Hay’adda Naafada Qaranku ku qabteen meello badan oo magaalada Muqdisho.
