Beijing,(SONNA):- Waxaa si habsami leh magaalada Beijing ee Dalka Shiinaha ugu soo idlaaday aqoon-isweydaarsi loo qabtay mas’uuliyiin ka socda Garsoorka Soomaaliya, iyadoo munaasabadda xiritaanka lagu qabtay xarunta Maxkamadda sare ee Dalkaas.
Aqoon-isweydaarsigan ayaa ujeedkiisu wuxuu ahaa kobcinta garaadka,iskaashiga iyo sare u qaadista xiriirka dhanka Garsoorka ee ka dhaxeeya Soomaaliya iyo Shiinaha, waxaanna isugu yimid khubaro dhanka sharciga oo ka kala socda labada Dalka.
Munaasabadda oo ay ka soo qeyb galeen marti sharaf iyo wakiilo ka kala socday Shiinaha iyo Soomaaliya ayaa waxaa khudbado ka jeediyay mas’uuliyiin oo ay ka mid yihiin Mudane Liu Guixiang oo ah xubin joogta ah oo ka tirsan guddiga cadaaladda iyo Garsoorka ee Maxkamadda Sare ee Shiinaha iyo Danjire Cawaale Cali Kullane, Safiirka Jamhuuriyadda Federaalka Soomaaliya ee Shiinaha, wuxuuna Danjiruhu u mahadceliyay 19- xubno ee ka socday garsoorka Soomaaliya ee ka qeyb galay aqoon kororsigan.
Wuxuu Danjiruhu qiray inay ka go’an tahay kobaca xirfadda iyo sida ay ugu heelan yihiin horumarinta sharciga dalka. Wuxuunna sheegay in uu ku kalsoon yahay aqoonta iyo xirfadda lagu bartay inta uu socday siminaarka ay wax weyn ka tari doonto xoojinta garsoorka iyo cadaaladda Dalka.
Sidoo kale, Safiirka JFS ee Dalka Shiinaha ayaa iftiimiyay sida wanaagsan ee ay u wada shaqeeyaan Soomaaliya iyo Shiinaha,isagoo uga mahad celiyay Mudane Liu Guixiang oo Shahaadooyin guddoonsiiyay guddoonsiiyay ka qaybgalayaasha aqoon-isweydaarsiga.
Ugu dambeyn, aqoon kororsigan loo qabtay mas’uuliyiinta Garsoorka Soomaaliya ayaa ahaa madal muhiim ah oo la isku dhaafsado aragti iyo wadashaqeyn dhexmarta Soomaaliya iyo Shiinaha. Iyadoo loo abuurayo fursado xirfadlayaasha sharciga ah si ay u wadaagaan hab-dhaqanka iyo khibradaha ugu wanaagsan, waxayna madashan dhabaha u xaaray nidaam garsoor oo xoog badan, caddaalad ah, oo hufan oo labada waddan ah.
