Muqdisho.(SONNA):- Argagixisada dhibaatada adag ku haysay dalka muddooyinkan waxay wajahayaan xaalad adag oo ka dhalatay howlgallada socda oo ay iska kaashanayaan ciidamada xoogga dalka iyo shacabka ka kacay dhagarta Khawaarijta Al-shabaab.
Iskaashiga Shacabka iyo ciidamada waxay keentay in deegaanno badan laga saaro maleeshiyada kooxda, iyadoo Bulshadii loogu tegey goobihii la qabtay laga dareemayo dhibaatadii ay ku jireen in ka badan 14-sano.
Mas’uuliyiinta iyo saraakiisha ugu sareyso ciidamada xoogga dalka Soomaaliyeed waxay wadaan tallaabooyin lagu dhiiragelinayo Shacabka si loo sii wado howgalka dalka looga xoreynayo argagixisada.
“ Annaga meesha aan joogno inaan horay uga sii socono ma ogiyee, meel hadda noo qorsheysan oo gadaal uga laabano ma jiro, mar haddii aan u adeegeynno qarabkeenna, oo mar aan u adeegeynno Bulshadeynii, oo mar aan u adeegeynno annaga shaqsiyadeenna sidii ay u nabad geli lahayd, nafteenna, sharafkeenna, maalkeenna iyo cisigeenna halkee uga noqon karnaa, xaq aan u diriri lahayn oo intaas nooga horeeya maa jira, haddii ay cid tahay in laga badbaadiyo Diinta Islaam, waxaa in laga badbaadiyo u baahan nimankan Khawaarijta ah ee afka duuban,” ayuu yiri Generaal Odawaa Yuusuf Raage.
Shacabka ciidanka garabka u ah wali waxay u caaboon yihiin sidii wadanka ay uga qaban lahaayeen kooxda Khawaarijta Al-shabaab oo banneystay dhiiga Shacabka Soomaaliyeed ee muslimiinta ah.
“ Nin walba dan ayuu lahaa waxa meeshan ina keennay rag iyo dumar waa inaan iska dhicino Al-shabaab, waa inaan Al-shabaab iska celino, wax uu inoo reebtay ma jiro, diyaar baanu u nahay inaan qaadanno kaalinta ummadda Soomaaliyeed ay ka qaadaneyso nimankaas diyaar baanu u nahay, ciidankana waxay u diyaar-garowbeen deegaannada oo dhanna kormeer ayaa ku soo marnay,”.
“ Culeyska ay nagu hayaan ayay walaalaheenna ku hayaan inaan ka dul qaadno, oo ka daba tagno oo iyaga aan la kaashano inaan diyaar u ahaanno ayaa la rabaa,” ayuu yiri mid ka mid ah dadka deegaanka oo qoriga u qaatay dagaalka Khawaarijta.
Waxaa hadda socda qorsha wejiga labaad ee dagaalka ka dhanka Khawaarijta, kaas oo la doonayo in dalka guud ahaan looga xoreeyo argagixisada, waxaana kaalin weyn ka qaadanaya shacabka Soomaaliyeed oo doorar kala duwan ka qaadanaya sidii loo ciribtiri lahaa dhaqar qabayaasha Al-shabaab.
“halkan lama joogayo, waxaan rabnaa inaan 30-qof kaga tagno, soo xero weyn ma ahan xeradan, in la socdaan rabaa oo waddan furno oo dadka noo yeerayo aan u tagno Shabaabna ka dul qaadno,” ayuu yiri Axmed Madoobe oo ciidanka qaranka kula hadlayay deegaanka Jannaay cabdalla.
Muddo dhowr iyo toban sano ah, qeybo ka mid ah dalka waxaa ku habsaday argagixiso sidii Ayaxa beer galay bulshada Soomaaliyeed ka dhigay kuwo ay dileen, kuwo hantidooda ay boobeen iyo kuwo ay badeen cabsi iyo argagax,balse iminka shacabka oo Dowladda kaashanaya waxay go’aansadeen in ay dalkooda ka xoreystaan Khawaarijta si uga nastaan dhibkooda.
