Muqdisho:(SONNA) – Xildhibaanada golaha shacabka JFS ayaa maanta kulan ku leh xarunta ku meelgaarka ah Villa Hargeysa ee magaalada Muqdisho.
Kulanka ayaa lagu wadaa inuu furmo saacadaha soo socda, waxaana shir guddoomin doono sidda lagu wado guddoomiyaha shacabka mudane Maxamed Mursal Sheekh Cabdiraxmaan, kaas oo dhowaan ka soo laabtay safarkii uu ku tegay dalka Jamhuuriyadda Jabuuti.
Xildhibaanada ayaa kulankooda kaga doodaya xeerka qoondada haweenka oo ka mid ah afarta xeer ee guddiga wadajirka ah loo xil saaray in ay soo diyaariyaan.
Waxaana dooda diirada lagu soori doonaa in 30% ey helaan haweenka oo ah qoondada ay ku leeyihiin dowladda federaalka.
Kalfadhigaan oo ah kii 7-aad ee golaha shacabka ayaa ugu dambeeya muddo xileedka baarlamaanka 10-aad ee dalka, waxaana u dhiman oo kaliya bilooyin.
