Kismaayo-(SONNA)-Dadka ku nool degmada Afmadoow ee gobolka Jubbada hoose ayaa saaka ku waabariistay xaalad middii hore ka adag, iyadoo biyahu ay intii hore aad uga badan yihiin.
Gooba ganacsi iyo Gguryo badan ayaa saaka laga qaxay, iyadoo biyaha ay waddo dooxada Lag-dheeraa ay aad uga badan yihiin xaddiga la xakamayn karo.
Maamulka degmada oo cod baahiye magaalada la dhex maraya magaalada ayaa bulshada ugu yeeraya in ay soo baxaan si biyaha ay isaga moosaan.
Dhinaca kale, dhulka u dhexeeya magaalada Kismaayo illaa Baar Sanguuni oo lagu qiyaasay masaafa gaaraysa 62 KM ayaa laga bara kacay, markii ay dadka halkaasi ku noolaa soo wajahday cabsi xooggan.
Magaalada Dhoobleey oo dhacda xadka Soomaaliya iyo Kenya iyo tuulooyin badan halkaasi ku yaalla ayaa sidoo kale aad looga cabsi qabaa in ay soo gaaraan daadad xooggan ka dib roobab lixaad leh oo halkaasi ka da’ay saacadihii lasoo dhaafay.
Qaar ka mid ah odayaasha iyo wax garadka degmada Ceelwaq ee gobolka Gedo oo la hadlay warbaahinta Qaranka ayaa baaq u diray dhammaan walalaha Soomaaliyeed iyo dadka muxsiniinta ah in ay usoo gurmadaan dadka tabaaleysan ee ku waxyeelloobay daadadka iyo fatahaadaha ka jira halkaasi.
