Muqdisho (SONNA)-Wasiirka Haweenka iyo Horumarinta Xuquuqda Aadanaha, xukuumadda Soomaaliya, Marwo Xaniifa Maxamed Ibraahim, iyo wefdi isugu jiro wasiiro, taliye ku xigeenka ciidanka xoogga dalka iyo mas’uuliyiin kale ayaa maanta safar ku tagay degmada Bardaale ee gobolka Baay.
Wafdiga ayaa intii ay halkaas joogeen waxay tageen xerada lagu diyaarinayo ciidan loogo talagalay in ay argagaxisada la xoreeyaan deegaanada hoos yimaadda degmada.
Sidoo kale, wasiir Xaniifa iyo mas’uuliyiinta kale waxay kulan la yeesheen maamulka degmada iyo qeybaha bulshada ayagoo ka xog wareystay xaaladda guud ee degmada Bardaale.
Wasiirka Haweenka Soomaaliya wafdiga maanta ku wehliyay safarka Bardaale, waxaa kamid ahaa wasiirka Caddaaladda xukuumadda Soomaaliya, mudane Cabdiqaadir Maxamed Nuur, wasiir ku xigeenka Gaashaandhigga, mudane Cabdifitaax Qaasim, Xildhibaan Malaaq Dhaayow oo ka tirsan golaha shacabka iyo taliye ku xigeenka ciidanka xoogga dalka Janaraal Cabbaas Aamin Cali.
Wafdiga ayaa si nabad ah ugu soo laabtay magaalada Muqdisho ka dib markii ay safar shaqo oo ku tageen gobolka Baay.
