Geneva (SONNA): Wasiirka Caafimaadka iyo Daryeelka Bulshada XFS, Dr. Cali Xaaji Aaden ayaa magaalada Geneva kulan la yeeshay madax sare oo ka tirsan Hay’adda Caalamiga ah ee Tamarta Atomiga (IAEA), taasoo Soomaaliya ku biirtay sanadkii 2024.
Kulanka ayaa diiradda lagu saaray xoojinta iskaashiga caafimaadka Soomaaliya iyo IAEA, iyadoo la horumarinayo adeegyada kansarka laga bilaabo ogaanshaha ilaa daaweynta. Waxaa sidoo kale lagu falanqeeyay adeegsiga radiation-ka iyo teknoolojiyadda nukliyeerka ee baaritaanka iyo daaweynta kansarka si loo helo adeegyo casri ah oo gudaha dalka ka jira. Iyadoo uu wasiirku la wadaagay qorshaha dhismaha Machadka Qaranka ee Kansarka (SNCI) iyo taageeridda Qorshaha Qaranka ee Xakamaynta Cudurrada Faafa (NCDs) ee 2024–2029, kaas oo muhiim u ah horumarinta adeegyada caafimaadka dalka.
Kulanka Wasiirka Caafimaadka waxaa ku wehliyay Safiirka Soomaaliya ee dalka Switzerland iyo Wakiilka Joogtada ah ee UN ee Hay’adaha Caalamiga ah, Marwo Khadra Axmed Dualle, iyo Agaasimaha Guud ee Wasaaradda Caafimaadka XFS, Dr. Guuleed Cabdijaaliil.
Kulanku wuxuu kor u qaadayaa awoodda Soomaaliya ee la dagaalanka kansarka iyadoo la adeegsanayo teknoolojiyada casriga ah ee caafimaadka. Sidoo kale, kulankan wuxuu gogol xaar u yahay iskaashi dheeraad ah oo mustaqbalka dhow ka dhex abuuri doona Wasaaradda Caafimaadka Soomaaliya iyo Hay’adda IAEA, si loo horumariyo adeegyada ogaanshaha, daaweynta, iyo kahortagga kansarka dalka.
