Muqdisho (SONNA)-Wasiirka Wasaaradda Caafimaadka Galmudug Dr. Cabdiwali Cabdullaahi Jaamac ayaa maanta si rasmi ah usoo xiray shirka dib u eegista iyo isku xirka mashaariicda caafimaadka Galmudug oo ay magaalada Dhuusamareeb mudo labo cisho ah kaga qayb galeen dhamaan hey’addaha ka shaqeeya Caafimaadka, Nafaqada iyo fayadhowrka ee ka howlgala Deegaanada Galmudug.
Kulankan ayaa dib loogu eegayay wax qabadkii sanadkan sii idlaanaya ee Arimaha Caafimaadka, Nafaqada iyo fayadhowrka, iyadoo lagu soo bandhigey culeesyada jira iyo meelaha aan wali wax laga qaban ee u baahan in lagu daro qorshaha sanadka dhalanaya ee 2021.
Agaasimaha Guud ee Wasaaradda caafimaadka Galmudug Dr. Cabdiwali Maxamed Axmed ayaa gaba gabada shirkan sharaxaad ka siiyey Wasiirka iyo kasoo qaybgalayaasha xogaha la uruuriyey ee muujinaya heerka Caafimaadka Nafaqada iyo fayadhowrka oo dadaal badan la galiyey sanadkan iyadoo la kaahshanaya macluumaadka ay uruuriyeen hey’addaha taageera Wasaaradda ee kulankan kasoo qayb galey.
Wasiirka Wasaaradda Caafimaadka Galmudug Dr. Cabdiwali Cabdullaahi Jaamac oo gunaanadka shirka Warbaahinta la hadley ayaa shaaciyey in shirkan laga gaarey isfaham rasmi ah oo haatan kadib xaqiijinaya in Wasaaradda iyo hey’addaha ka shaqeeya Arimaha Caafimaadka ay wada gaaraan go’aanka mashaariicda la fulinayo si loo doorto halka ugu haboon ee ay kajirto baahida ugu mudan.
