Muqdisho,(SONNA):- Wasiirka Ganacsiga iyo Warshadaha Soomaaliya, Mudane Maxamuud Aadan Geesood, iyo Wasiirka Beeraha iyo Waraabka, Mudane Maxamed Cabdi Xayir (Maareeye), ayaa maanta si wadajir ah u booqday kaydka badeecooyinka laga keeno dibadda ee ku yaalla Garoonka Diyaaradaha Aadan Cadde ee magaalada Muqdisho.
Intii lagu guda jiray kormeerka, wasiirradu waxay arkeen khudaar ay ka mid yihiin liin-dhanaan, moos, kabsar, salar, iyo basal — kuwaas oo laga soo dhoofiyay dibadda, inkastoo ay yihiin dalagyo si dabiici ah uga soo go’a gudaha dalka Soomaaliya.
Iyagoo muujiyay walaac qaranimo iyo wacyi wadaniyeed, wasiirradu waxay sheegeen in dalagyada noocan oo kale ah aysan u baahnayn in dalka la keeno, maadaama ay dhaawacayaan dhaqaalaha beeraleyda Soomaaliyeed iyo wax-soo-saarka gudaha.
Labada wasiir waxay Hay’adda Tayo-dhowrka Soomaaliyeed farayaan in ay si buuxda u gudato waajibaadkeeda, lana xakameeyo soo gelitaanka badeecooyinka aan tayada lahayn, gaar ahaan dalagyada si dabiici ah uga baxa gudaha dalka. Waxaay sidoo kale ku adkeeyeen muhiimadda ay leedahay ilaalinta tayada badeecooyinka dalka soo galaya si loo sugo caafimaadka bulshada iyo kobaca dhaqaalaha gudaha.
Wasiirradu waxay ugu dambeyn ku booriyeen ganacsatada iyo shacabka Soomaaliyeed in ay door bidaan wax-soo-saarka gudaha, taasoo ah tallaabo lagu xoojinayo isku filnaanshaha, waddaniyadda, iyo horumarka dalka.
