Muqdisho(SONNA):-Wasiirka wasaaradda Gaashaandhiga xukuummadda Federaalka Soomaaliya Mudane Cabdulqaadir Maxamed Nuur oo la hadlay warbaahinta Qaranka ayaa u xaqiijiyey in hawgaladii ugu dambeeyey ee dhanka Cirka ah khawaarijta looga dilay tiro ka badan 150,kuwaas oo ay ku jiraan horjoogeyaal sar sare.
Wasiirka ayaa xusay in goobaha sida weyn loogu naafeeyey khawaarijta ay kala yihiin deegaano ka kala tirsan Ceel bacad Axmed,Laba garas,jambaluul,Ceel garas iyo damasha Shabeellow,kuwaas oo dhamaan haraadigii khawaarijta ee goobahan ku dhuumanayey la ciribtiray,”Duqeymo tiro beel ah oo lagu naafeeyey Khawaarijta ayaan 48-dii saac ee la soo dhaafay ka fulinay goobo cadowgu ku dhuumaaleysanayay, in ka badan 150 Khawaarij ayaa ku naf waayay howlgalka,”
Dhinaca kale wasiirka ayaa shacabka Soomaaliyeed uga digay in ay ka soo ag dhowaadaan goobaha khawaarijta lagu beegsanayo,” mar kale Shacabka waan u digeynaa haka fogaadaan goobaha cadowgu joogo, waa la beegsanaa”.ayuu yiri wasiirka.
Ciidanka Qaranka iyo kuwa dib u xoraynta deegaanka ayaa maalmihii u dambeeyey waday hawlgalo lagu ciribtirayo kooxda khawaarijta iyadoo 48 saac u dambeeyey si xiriir ah Ciidanku u waday hawlgalo isugu jira cirka iyo dhulka kuwaas oo si weyn lagu jabiyey khawaarijta.
