Muqdisho (SONNA): Kusimaha wasiirka ahna wasiir ku-xigeenka wasaaradda Warfaafinta, dhaqanka iyo dalxiiska XFS, mudane Cabdiraxmaan Yuusuf Al-cadaala ayaa maanta oo Arbaco ah ku soo xiray magaalada Muqdisho kulanka Wadatashiga Istiraatijiyadda Qaran ee Warbaahinta iyo wada xiriirka.
Kulanka aqoon isweydaarsiga Wadatashiga istiraatijiyadda Qaran ee warbaahinta iyo wada xiriirka ( National Communication strategy ) oo socday muddo seddex maalmood ah ayaa waxaa soo qaban qaabisay wasaaradda Warfaafinta, Dhaqanka iyo Dalxiiska Soomaaliya, waxaana ka qeyb-galay madaxda qeybaha warfaafinta ee hay’adaha dowladdda Federaalka, gobolka Banaadir, Warbaahinta iyo qeybaha bulshada.
Kulanka ayaa intuu socday waxaa diiradda lagu saaray sidii loo dabooli lahaa baahida bulshada looguna gudbin lahaa farriimo wanaagsan oo mid ah , isku xirka dowladda iyo shacabka Soomaaliyeed iyo helidda istaraatiijiyad mideysan oo lagu wajahayo habka warbaahinta iyo wacyi-gelinta dadweynaha, iyada oo xoogga la saarayo la dagaallanka khawaarijta.
Wasiir ku xigeenka oo ka hadlayay ayaa u mahad celiyay mashruuca TIS3/USAID oo wasaaradda ka taageeraya sameynta istiraatiijiyadda, hay’adda Perspective Media oo farsamo ahaan kala caawinaysa iyo hawlwadeenada hay’adaha dowladda iyo qeybaha bulshada ee wadatashiga u socday maalmihii la soo dhaafay.
Wasiir Caddaala ayaa hoosta ka xariiqay in qorridda istiraatiijiyaddani muhiim u tahay isku soo dhowaashaha dowladda iyo dadweynaha, mideynta farriimaha dowladda iyo jiheynta horumarka dalka, ayna wasaaradda sii gaarsiin doonto dhammaan hay’adaha muhiimka u ah wadatashida sida dowlad goboleedyada si taladooda ay ugu daraan.
Wajiga koowaad ee Wadatashiga waxaa xigaya kuwa kale oo dhacaya bilaha soo aaddan oo looga talo galinayo dowlad goboleedyada iyo hay’adaha kala ee lagama maarmaanka u ah in la tashiyo lagala sameeyo istaraatiijiyaddani.
