Muqdisho (SONNA): Waxaa maanta la soo gabagabeeyay wada-tashi labo maalmood socday oo ay si wadajir ah u qabteen Wasaaradda Qoyska iyo horumarinta Xuquuqul Insaanka ee Dowladda Federaalka Soomaaliya (DFS) iyo Hawlgalka Ku-meel-gaarka ah Kaalmada Qaramada Midoobay ee Soomaaliya (UNTMIS). Kulankaan ayaa lagu lafa-guray qorshaha iyo habraacyada lagu wareejinayo faylka Qaybta Xuquuqul Insaanka iyo Ilaalinta (HRPG) ee UNTMIS, loona wareejinayo Dowladda Federaalka Soomaaliya iyo hay’adaha Qaramada Midoobay ee dalka (UNCT).
Wadatishigan oo ay ka qaybgaleen 25 mas’uul oo ka kala socday hay’adaha dowladda iyo 23 wakiil oo ka socday hay’adaha Qaramada Midoobay, ayaa diiradda lagu saaray sidii loo sii wadi lahaa dadaallada hadda socda ee ku aaddan ilaalinta iyo horumarinta xuquuqul insaanka, iyadoo la waafajinayo qorshayaasha mustaqbalka iyo mudnaanaha qaranka Soomaaliya.
Agaasimaha guud ee wasaaradda mudane Maxamed Bashiir Cumar oo khudbad ka jeediyay xiritaanka kulanka, ayaa carrabka ku adkeeyay sida ay dowladda uga go’an tahay dhowrista iyo kor u qaadista xuquuqul insaanka ee dalka. Wuxuu tilmaamay in wareejintani ay astaan u tahay tallaabo weyn oo loo qaaday dhinaca lahaanshaha qaran iyo isku-filnaanshaha muddada fog. “Soomaaliya waxay diyaar u tahay inay si buuxda ula wareegto hoggaaminta ajendaha xuquuqul insaanka, annagoo ka duulayna qiyamkeenna, waajibaadyadeenna caalamiga ah, iyo himilooyinka shacabkeenna,” ayuu yiri Agaasimaha Guud.
Agaasimaha ayaa sidoo kale hoosta ka xariiqay muhiimadda ay leedahay iskaashi sii socda oo dhexmara dowladda iyo saaxiibada caalamka, si loo abuuro nidaam isku-dhafan oo waxtar leh oo dhinaca ilaalinta xuquuqda aadanaha ah. Wuxuu ku baaqay in la sii xoojiyo dhismaha tayada, helitaanka dhaqaalaha, iyo adkaynta hay’adaha si loo taageero geeddi-socodka kala-guurka, loona xaqiijiyo in adeegyadu ay si joogto ah u socdaan.
Waxaa sidoo kale munaasabadda hadallo ka jeediyay Danjire Yuusuf Garaad Cumar, iyo Ku-xigeenka Wakiilka Gaarka ah ee Xoghayaha Guud ee Qaramada Midoobay, Mundane Raisedon Zenenga.
