Muqdisho (SONNA): Wasiirka Wasaaradda Caafimaadka iyo daryeelka bulshada Xukuumadda Federaalka Soomaaliya Dr Cali Xaaji Aadam ayaa maanta si rasmi ah u daahfurey Tallaalada Oofwareenka iyo Shubanka oo loogu talagaley Caruurta Soomaaliyeed.
Munaasabadda daahfurka Tallaalada waxaa kasoo qeyb galey Agaasimaha guud ee Wasaaradda Caafimaadka Dr. Guuleed Abdijaliil, wakiilo ka socdey hey’adaha UN-ka, UNCEF, WHO, GAVI, Ururka Dhakhaatiirta Soomaaliyeed, Agaasime waaxeedyo, madaxda Isbitaalada dowliga, xubno kale oo ka socdey Hey’adaha kale ee Dowladda iyo marti Sharaf kale.
Tallaaladan ayaa ah kuwa ahmiyad gaar ah siinayo badbaadinta Caruurta Soomaaliyeed, waxaan Wasaaradda Caafimaadka dadaal iyo juhdi dheeraad ah ku bixisey sidii loo heli lahaa Tallaaladan kala ah Oofwareenka iyo Shubanka oo qiyaastii tiro aad u badan oo Caruur Soomaaliyeed ah ay u dhintaan xanuunadan iminka Tallaalkooda la helay.
Wasiir Cali Xaaji Aaden oo munaasabada khudbad ka jeediyay ayaa ka hadlay ahmiyada ay talaaladaan u leeyihiin caruurteenna Soomaaliyeed, iyada oo ay Wasaaradda Caafimaadkuna kordhineyso wacyigelin la xiriirta sidii ay ugu faa’ideysan lahaayeen bulshadeenna tallaaladan dalka soo gaarey. Sidoo kale, Wasiir Dr Cali Xaaji ayaa shaaciyay in talaaladan la geeyay dhammaan maamul goboleedyada dalka.
Wasaaradda Caafimaadka iyo daryeelka bulshada Xukuumadda Federaalka Soomaaliya waxaa ka go’an kor u qaadista wacyigq bulshada ee ku aadan sidii bulsho waynta Soomaaliyeed u fahmi lahaayeen muhiimadda uu Carruurta Soomaaliyeed u lee yahay Tallaalada iyadoo la raacayo habraacyada Wasaaradda Caafimaadka ee ku aadan wacyigelinta.
