Muqdisho-(SONNA)-Wasaaradda Beeraha iyo Waraabka ee Soomaaliya ayaa Muqdisho ku qabatay kulan lagu soo bandhigayey Siyaasadda isticmaalka Dhul-Beereedka
Mas’uuliyiinta Wasaaradda Beeraha, Xubno ka kala socday Maamul Goboleedyada, Rugta Ganacsiga, Iskaashatooyinka Beeraha iyo qubaro ku xeel dheer dhanka Beeraha ayaa ka qeybgalay kulankan oo u jeedkiisu ahaa Latashiga Kowaad ee Siyaasadda Isticmaalka Dhul-Beereedka oo ay soo diyaarisay Wasaaradda Beeraha iyo Waraabka Soomaaliya.
Agaasimaha Qorsheynta iyo Siyaasadda ee Wasaaradda Beeraha iyo Waraabka Soomaaliya Maxamuud Yaasiin Cartan ayaa sheegay in siyaasadan ay muhiim u tahay dalka, islamarkaana ay ka qeyb galaayashu ka aragti dhiiban doonaan muhiimadda ay leedahay helidda siyaada cad oo loo dhan yahay taas oo fure u noqon doonta in si wanagsan loo isticmaalo dhul-beereedka.
Wasiir ku xigeenka wasaaradda Beeraha iyo Waraabka Xaamud Cali Xasan ayaa sheegay In Siyaasadda Isticmaalka Dhul-Beereedka ay door weyn ka qaadan doonto soo afjaridda muranka ka dhasha dhul-beereedyada.
Agaasimaha Guud ee Wasaaradda Beeraha iyo Waraabka Soomaliya Nuur Yuusuf Nuur oo kulanka soo xiray ayaa xusay in Siyaasadan ay qeyb ka tahay dadaallada ay Wasaaraddu ugu jirto horumarinta Beeraleyda iyo kobcinta wax soo saarka Dalka.
