Muqdisho (SONNA): Soomaaliya waxaa ku dhufatay abaar baahsan oo sameysay dadka iyo duunyada, guud dalka majirto qeyb aysan saameyn ku yeelan abaartaan, sidoo kale qeybo kamid ah dalka Wabiyada ayaa guray.
Gobollada dalka meel kasta waxaa laga soo werinayaa in xooluhu ay u dhimanayaan gaajo, kadib markii ay waayeen calaf ay daaqaan, biyo la’aan ayaa u dheer, taasi oo rajo beel dhigtay qoysas badan oo reer miyi ah.
Waxaa halis ku jirta oo gurmad bini’aadanimo degdeg ugu baahan nolosha dadka Soomaaliyeed ee ku tiirsanaa xoolaha iyo tacabka beeraha oo maanta beylah ah, khatarna ugu jira in xaalkoodu gaaro heerka macluusha.
Dowladda Soomaaliya ayaa qaadaneysa doorkeeda gurmadka, balse madaxda qaranka waxay muujiyeen inaan laga maarmin deeqda walaalaha Soomaaliyeed ee wax heysta, kuwaas oo ku caan ah in lagu baxsado markaan oo kale.
Golaha Wasiirrada Xukuumadda Federaalka Soomaaliya ayaa maanta yeeshay kulankoodii joogtada ahaa ayaa lagu soo bandhigay warbixinno ka tarjumaya xaaladda abaaraha ka jira gayiga Soomaaliyeed iyo saameynta dhanka biyaha iyo cuntada ah ee ay ku yeelatay dalka, iyada oo ay Xukuumaddu qorshaynaso tallaabooyin degdeg ah oo wax looga qabanayo xaaladda taagan.
Madaxweynaha JFS Mudane Sheekh Maxamuud ayaa saacadihii u dambeeyey booqday Xarunta Hay’adda Maareynta Musiibooyinka Qaranka ee SoDMA, si xaalka abaarta, deegaanada ugu daran, barakaca ka dhashay, nabaad guurka deeegaanka iyo qasaaraha nafeed uu ugu kuur galo.
Xooraansiga xaalka iyo warbixin dhageysi kadib, Madaxweyne Xasan Sheekh ayaa qabtay shir jaraa’id oo hay’adaha dowladda uu ku faray in ay mudnaanta koowaad siiyaan gurmadka abaaraha iyo gargaar gaarsiinta dadka iyo duunyada ku tabaaleysan gobollada dalka.
Sidoo kale, Madaxweyne Xasan Sheekh wuxuu faray masuuliyiinta kastamyada dalka, in gabi ahaanba canshuurta laga dhaafo hay’adaha sida gargaarka nooc kasta oo ay yihiin, si loo fududeeyo howlaha gurmadka abaaraha.
Hadaba Barnaamijka Kulanka Toddobaadka ee Warbaahinta Qaranka, waxaan toddobaadkaan uga hadli doonaa arrimaha baarta ka dilaacday dalkeena, waxaana noogu marti ah Guddoomiyaha Hay’adda Maareynta Musiibooyinka Qaranka ee SoDMA Mudane Maxamuud Macalin oo soo bandhigaya xogta abaartaan oo dhameystiran, kala soco SNTV caawa 8:00 PM.
