Muqdisho (SONNA)- Wafdi ay hogaaminayaan Wasiirka Dastuurka Xukuumadda Federaalka Soomaaliya mudane Salaax Axmed Jaamac Wasiir ku-xigeenka Warfaafinta, Dhaqanka iyo Dalxiiska Aadan Isaaq Cali oo ay ka mid yihiin Senator Cabdiwaaxid Cilmi Goonjeex oo ka tirsan Golaha Aqalka Sare iyo Xildhibaanno ka tirsan Golaha Shacabka, Wasiirro iyo Xildhibaano ka tirsan Maamulada Galmudug, Puntland, Hirshabeelle, Jubbaland iyo Koonfur Galbeed, Xubno ka socday Maamulka Gobolka Banaadir ayaa maanta safar isugu jira marti qaad iyo dalxiis ku tegay Degmada Caabudwaaq ee Gobolka Galgaduud.
Xubnaha ka socday Maamul Goboleedyada iyo Gobolka Banaadir ee ka mid ahaa wafdigaan ayaa waxaa ka mid ah, Wasiiru dowlaha Duulista Hawada, Puntland Maxamed Xasan, Wasiirka Caafimaadka Galmudug Cabdiwali Jaamac, Wasiirka Caafimaad Jubbaland, Mursal Qaliif, Wasiirka Dastuurka Galmudug Daa’uud Maxamed Maalin. Guddoomiye ku-xigeenka dhinaca Amniga Maamulka Gobolka Baandir Maxamed Axmed Tuulax, Xoghayaha Guud ee Gobalka Banaadir Cumar Cabdirisaaq iyo xubno kale.
Wafuudan ayaa marti qaad ka helay maamulka Degmada Caabudwaaq, kuwaasi safar dhulka ah kaga tegay Dhuusamareeb kuna gaaray Caabudwaaq, halkaasi oo ay kula kulmeen soo dhaweyn diiran.
