Ciidanka Kumaandoosta Danab ee xoogga dalka Soomaaliyeed ayaa shalay si guul leh u fuliyey howlgal qorsheysan oo ka dhacay degmada Masaajid Cali-gaduud ee gobolka Shabeellaha dhexe. Howlgalka oo ka dhacay bartamaha degmada iyo deegaanada ku dhow ayaa lagu beegsaday xarumo ay ku sugnaayeen maleeshiyaad ka tirsan Khawaarijta.
Duqeymo Cirka ah oo ay iska kaashadeen saaxiibada caalamka iyo CXDS oo ay wehliyaan hawlgallo dhulka ah oo lagu dilay in ka badan 15 xubnood oo ka tirsan argagixisada ayaa sidoo kale lagu gubay saddex gaari oo labo ka mid ah ay ahaayeen gaadiid dagaal, halka midka kalena uu ahaa Ambalaas oo ay u adeegsanayeen ujeeddooyin qaldan.
Inta lagu guda jiray hawlgalka, waxaa la qaarajiyay Bashiir Axmed Dhuxul oo loo yaqaanay Bashiir Caadle, kaas oo ahaa Amiirka Dacwada ee Khawaarijta Al-Shabaab ee gobolka Shabeellaha dhexe. Khawaarij Bashiir Caadle ayaa ka mid ahaa horjoogeyaasha ugu firfircoon ee ka qeyb qaata abaabulka iyo faafinta fikirka xagjirka ah, waxaana dilkiisa uu dhirbaaxo culus ku yahay hoggaanka kooxda Khawaarijta.
Ciidamada geesiyaasha ah ee Danab ayaa weerarka si xirfadaysan u fuliye, iyagoo bartilmaameedsaday goobo muhiim ah oo ay argagixisadu ku dhuumaaleysanayeen, kuna diyaarinayeen falal amni darro. Argagixisadii lagu beegsaday howlgalka ayaa ka cararay goobihii ay ku sugnaayeen, iyagoo halkaasi kaga tegay meydad iyo dhaawacyo badan.
Taliska Ciidanka Xoogga Dalka Soomaaliyeed wuxuu caddeynayaa in howlgalkaan uu qeyb ka yahay qorshaha ballaaran ee lagu ciribtirayo argagixisada, laguna xaqiijinayo nabadda iyo xasiloonida dalka.
Dowladda Federaalka Soomaaliya waxay uga digeysaa kooxaha argagixisada ah in aan loo dulqaadan doonin khatar kasta oo ay ku hayaan shacabka Soomaaliyeed.
Abwaanad Shamso Sheekh Cali ayaa Geeraar ku aadan dhaqamada xun xun ee ee kooxda Khawaarijta ah ayay tilmaantay “Muslim aan Ilaah beenin waxay gaal u bixiyaanba baroortoodi soo umadda dhami kuma bishaareysan.”
Dhinaca kale ‘Waa Geesiyaal Wiilasha iyo Gabdhaha Reer Hiiraan, 24 saac wax ka yar ayey khawaarij uga saarteen dhowr magaalo oo ka tirsan Gobolkaasi’.
Sawirkaan waa shalay, goobtuna waa Deegaanka Abooreey oo ka tirsan Gobolka Hiiraan, waa Gabar Soomaaliyeed oo Biyo siinaysa Wiil Dagaalyahan ah oo ku Oomay Xabadda uu Khawaarijta ku ridayo, waana dhaqan lagu yaqaan Gabdhaha Soomaaliyeed inay Mujaahidiinta Xoogga Dalka ka daba wadaan Biyo Caano.
Waa Sawir ka tarjumaya xaqiiqada Dagaalka ay Dadkeenu kula jiraan Khawaarijta oo ah mid aan loo kala harin. Insha allaah waa laga adkaanayaa Khawaarijta, sidaasi waxaa yiri:- Wasiir Cadaala Kuxigeenka Warfaafinta mudane Cabdiraxmaan Yuusuf Cadaala.
Wararkii ugu dambeeyay ee laga helayo dagaalada culus ee lagula jiro kooxda Khawaarijta ee Al-shabaab in gabi ahaanba laga saaray deegaanno badan saacadihii la soo dhaafay sida uu ku waramayo Wasiir ku-xigeenka Wasaaradda Warfaafinta dhaqanka iyo dalxiiska XFS mudane Cabdiraxmaan Yuusuf Al-cadaala, isagoo intaasi raaciyay in ciidanka xoogga dalka iyo kuwa deegaanka ay saakay howlgal qorshaysan kaga saareen deegaanka Geel-gub ee gobolka Shabeellada dhexe Malleeshiyaadka Khawaarijta, kuwaasi oo si dhuumaaleysi ah u soo galay.
Sida wararku sheegayaan Ciidamada ayaa weerar dhowr jiho ah ku qaaday Malleeshiyaad ka tirsanaa Khawaarijta oo si dhuumaaleysi ah kusoo galay deegaankaGeel-gub, si ay u dhibaateeyaan dadka shacabka ah, iyadoo khasaare ba’an lagu gaarsiiyay kooxda.
Waxaa maalintii shanaad oo xiriir ah ay geesiyada Qaranka iyo halgamayaasha deegaanku ay weerarro ku ekeeyeen Khawaarijtii isku soo maqiiqday maamulka goboleedka Hirshabeelle, iyadoo saakayna lagu laayay, lagana saaray deegaanka Geel-gub, islamarkaan dhawaan filo warar intaasi ka sii faahfaahsan.
