Muqdisho (SONNA)-Taliye ku xigeenka ciidanka dhulka xoogga dalka Sareeye Guuto Xuseen Xoosh Cali ayaa maanta kormeer shaqo ku tagay deegaano hoos taga caasimadda Galmudug ee Dhuusamareeb, gaar ahaan deegaanka Beer Liibaan oo dhanka beri kaga beegan magaalada.
Deeganada uu kormeeray Taliyaha ayaa waxaa ku sugan ciidamo macawiisleey ah, kuwaas oo ay dadka deegaanka abaabuleen una diyaarsan in ay la dagaalamaan maleeshiyaadka Al-Shabaab.
Taliyaha ayaa dhiira gelin u sameeyay ciidamada is abaabulay ee ku sugnaa deegaanadii uu maanta kormeeray wuxuuna u balan qaaday in ay dowladu ku garab siin doonto howsha ay wadaan oo ah la dagaalanka Argagixisada.
Kormeerkaan ayaa waxaa Taliyaha ku wehliyay, Saraakiil ka tirsan Qeybta 21-aad ee ciidanka xoogga dalka, Maamulka degmada Dhuusamareeb oo uu horkacayay Duqa Degmada Macalin Cabdiraxmaan Geedaqoroow iyo Masuuliyiin kale.
