Muqdisho.(SONNA):- Madaxweynihii hore ee maamulka Somaliland Axmed Maxamed Maxamuud ( Siilaanyo) ayaa xalay ku geeriyooday magaalada Hargeysa, waxaanna geeridiisa ka tacsiyeeyay madaxda qaranka iyo dhammaan haldoorka Soomaaliyeed.
Alle ha u naxariistee, Axmed Siilaanyo ayaa ahaaย siyaasi kaalin weyn ka soo qaatay nidaamka dowladnimada Soomaaliyeed, isagoo soo qabtay xilal kala duwan sida Wasiirka Wasaaradda Qorsheynta, Wasaaradda Ganacsiga, iyo Guddoomiyaha Guddiga Dhaqaalaha Qaranka ee Soomaaliyeed.
Wasiirkii hore ee wasaaradda warfaafinta, Dhaqanka iyo Dalxiiska Soomaaliya Senator Cusmaan Abokor Dubbe oo horay ula soo shaqeeyay marxuumka ayaa ka warbixiyayย taariikh nololeedkiisa iyo doorkii uu ka soo qaatay horumarinta dalka iyo dadka Soomaaliyeed.
”Inaa Lilaahi, waa inaa Ileyhi Raajicuun, halkaan waxaan tacsi uga dirayaa dhamaan Qoyska Ehelka Qaraabada ummadda reer Soomaaliland iyo guud ahaan Soomaali oo dhan meel kasta oo ay joogaan geerida madaxweynihii hore ee Soomaaliland Axmed Maxamed Maxamuud Siilaanyo, waa geeri aad u naxdin badan, aad uma xannuunsan, runtii 2017kii ayuu shaqada ka tegay gurigiisa ayuu iskaga qaadanayay nasiino, labo habeen buu yara xannuunsaday ka bacdina xalay bey tiisii noqotay, waana sunaha nolosha cid waareysa ma jirto, tanina waa ka sii naxdin badan tahayoo nin sidaa u weyn oo saamynt taariikhba leh ayuu ahaa,”. ayuu yiri Senator Dubbe.
Senator Dubbe, ayaa sheegay in Siilaanyo uu ku dashay howdka magaalada Burco ee gobolka Togdheer sanadkii, 1936, halkaas oo uu ku bartay Qur’aanka kariimka ah, ka dibna, wuxuu u baxay magaalada Seylac oo uu ka bilaabay waxbarashadiisa Maaddiga Dugsiga Camuud, ka dibna, uu Sheekh kaga sii gudbay.
Sida Senatorku sheegay Sannadkii, 1958-kii ayuu waxbarasho u aaday dalka Ingiriiska, halkaas oo uu digriiga koowaad cilmiga dhaqaalaha ka diyaariyay Jaamacadda (Manchester University),1950-kii, ayuu digrigii labaad qaatay, 1965, ayuu dalka dib ugu soo laabtay, wuxuuna ka shaqo bilaabay Bankiga Dhexe, ka dibna, wasaaraddii qorsheynta ayuu u wareegay, waxaana laga dhigay agaasimaha qorsheynta iyo horumarinta, isla wasaaraddaas ayuu ka noqday agaasimahada guud ilaa markii dambe oo Dowladdii Alle ha u naxariistee Maxamed Siyaad Barre dalka la wareegtay uu ka mid noqday golihii wasiirada ee xukuumaddaas oo uu ka noqday wasiirka qorsheynta.
Wasiirkii hore ee warfaafinta Senator Dubbe oo ku dheeraaday ka sheekeynta taariikh nololeedka madaxweynihii hore ee Somaliland Axmed Maxamed Maxamuu Siilaanyo ayaa tilmaamay in taariikhda marxuumka ay tahay mid ummadeed oo saameyn weyn ku leh dalka iyo dadkaba.
Sannadkii 1982-kii ayuu ka tegay shaqadii qaranka, isagoo aaday dalka Ingiriiska, halkaas oo uu kaga biiray ururkii SNM, wuxuuna 1984-kii noqday hoggaamiyii ururkaas, halkaas oo ay kaga bilaabatay olole kale oo siyaasadeed.
2010-kii, ayuu doorasho kaga adkaatay Daahir Riyaale Kaahin ku noqday madaxweynaha Soomaaliland, Sannadkii 2017 ayuu Siilaanyo xilka ka degay, wuxuuna nasiino ku qaadanayay gurigiisa oo ku yaalo magaalada Hargeysa, xannuun muddo labo habeen uu dareemaya ka dib, ayuu xalay u geeriyooday. Alle ha u naxariistee marxuumka ayaa lagu xasuusan doonaa dadaalkiisii hagar la’aaneed uu geliyay horumarinta iyo dib-u-dhiska dowladnimada iyo xirfaddiisii maamulka iyo maareynta dhaqaalaha.
Madaxweynaha Somaliland Muuse Biixi Cabdi ayaa si rasmi ah xalay u shaaciyay geerida AUN madaxweynihii hore ee Somaliland Axmed Maxamed Siilaanyo, waxaanna marxuumka la aasi doona maalinta isniinta ee soo socota.
