Muqdisho-(SONNA)-Wasiiru-Dowlaha Wasaaradda Gaashaandhigga XFS, Mudane Cumar Cali Cabdi, ayaa maanta si rasmi ah u furay Kalfadhiga 34-aad ee Hay’adaha Sare ee Ciidamada Heeganka Afrikada Bari (EASF), kaas oo markii ugu horreysay lagu qabanayo magaalada Muqdisho, iyadoo Soomaaliya ay sanadkan guddoon u tahay.
Wasiiru-Dowlaha ayaa madasha ka jeediyay khudbad soo dhaweyn ah oo uu ku bogaadiyay wakiillada dalalka xubnaha ka ah ururka, isagoo yiri:
“Waxaan si diirran idiinku soo dhaweynayaa magaalada Muqdisho, annagoo markii ugu horreysay martigelinayna Kalfadhiga 34-aad ee Ciidamada Heeganka Afrikada Bari. Martigelinta shirkan waxa ay muujinaysaa kalsoonida ay dalalka gobolka ku qabaan Soomaaliya, waxayna caddeyneysaa horumarka laga sameeyay amniga iyo dib-u-dhiska hay’adaha difaaca.”
Sidoo kale, Wasiiru-Dowluhu wuxuu xusay sida ay Soomaaliya uga go’an tahay ka qaybqaadashada dadaallada iyo himilooyinka istiraatiijiyadeed ee Bariga Afrika, isagoo carrabka ku adkeeyay muhiimadda ay leedahay xoojinta iskaashiga iyo isu-duwidda dalalka xubnaha ka ah ururka, gaar ahaan dhinacyada difaaca iyo amniga guud.
Wuxuu sidoo kale tilmaamay kaalinta muhiimka ah ee ay Ciidamada Heeganka Afrikada Bari (EASF) ku leeyihiin sugidda nabadda gobolka, isagoo sheegay in ay yihiin tiir muhiim ah marka laga hadlayo ilaalinta nabadda, ka hortagga khilaafaadka, iyo jawaab-celinta degdegga ah ee xaaladaha amni iyo bini’aadantinimo.
Wasaaradda Gaashaandhigga XFS ayaa sheegtay in martigelinta shirkan ay muujinayso doorka firfircoon ee ay Soomaaliya ka ciyaarayso xoojinta nabadda, amniga, iyo iskaashiga difaaca ee gobolka Bariga Afrika.
