Washington D.C.-(SONNA)-(SONNA)-Wasiirka Wasaaradda Qorshaynta, Maalgashiga iyo Horumarinta Dhaqaalaha ee Jamhuuriyadda Federaalka Soomaaliya, Mudane Maxamuud Sheekh Faarax (Beenebeene), ayaa ka qeybgalay Shirka Wasiirrada Qorshaynta, Horumarinta Dhaqaalaha iyo Maaliyadda ee Afrika.
Shirka ayaa waxaa looga hadlay dib-u-habaynta nidaamka maaliyadeed ee caalamka, kaas oo la qabtay intii lagu guda jiray shirarka sanadlaha ah ee Bangiga Adduunka iyo Hay’adda Lacagta Adduunka (IMF) ee ka socda magaalada Washington D.C.
Wasiirka ayaa ka sheegay sida ay Soomaaliya uga go’an tahay taageeridda aragtida mideysan ee Afrika ee ku aaddan nidaam maaliyadeed oo caddaalad ah, loo siman yahay, kana jawaabaya baahiyaha dalalka danyarta iyo kuwa jilicsan.
Wuxuu xusay in Soomaaliya ay ka go’antahay dib-u-habeynta dhaqaalaha iyo qorsheynta horumarineed si waafaqsan Qorshaha Isbeddelka Qaranka (NTP 2025–2029), kaas oo diiradda saaraya maalgelinta waarta, kobaca loo wada dhan yahay, iyo iskaashiga caalamiga ah ee lagu xaqiijinayo horumar waara iyo xasillooni dhaqaale.
Ka qeybgalka Soomaaliya wuxuu muujinayaa sida ay uga go’an tahay horumar waara oo loo wada dhan yahay, iyadoo Qorshaha Isbeddelka Qaranka iyo hiigsiga 2060 ay yihiin tiirarka hagaya himilada horumarineed ee dalka.
