Dhuusamareeb(SONNA):-Madaxweyne kuxigeenka Dowlad Goboleedka Galmudug Cali Daahir Ciid ayaa maanta magaalada Dhuusamareeb ka daahfuray Shirka Madasha Banii’aadannimada Soomaaliya (CHF) oo ay soo qaban qaabisay Hay’adda Maareynta Musiibooyinka (SoDMA) loogana hadlayo xaaladaha la xiriira arrimaha banii’aadannimada.
Guddoomiyaha Hay’adda Maareynta Musiibooyinka Maxamuud Macallin Cabdulle oo shirka ka qeyb galay ayaa yiri “Shirka Madasha Arrimaha Banii’aadanimada waxa uu ku soo aaday iyadoo shacabka Soomaaliyeed ay wajahayaan xaalad adag oo abaareed.”
Madaxwayne kuxigeenka Galmudug Cali Daahir Ciid oo shirka furay ayaa sheegay in raja weyn laga qabo in uu ka soo baxo shirkan qodobo waxa looga qabanayo xaaladaha Banii’aadannimo oo ay ugu horeyso abaaraha iyo Fatahaada.
“Shirkan indhaha caalamka iyo shacabka Soomaaliyeed ayaa kusoo jeeda, waxaana rajo ka qabnaa in ay ka soo baxaan qodobo dhaxalgal ah.”ayuu yiri Madaxwayne kuxigeenka
Shirkaan waxaa ka qeyb-galaya Guddoomiyaha Hay’adda Maareynta Musiibooyinka Maxamuud Macallin Cabdulle, wakiilo kale oo ka socda Dowladda Federaalka, wasaaradaha Gargaarka ee dowladaha xubnaha ka ah Dowladda Federaalka, Maamulka Khaatumo, Gobolka Banaadir, madax ka socota deeq-bixiyaasha, ururrada maxaliga ah iyo kuwa caalamiga ah.
