Baydhabo-(SONNA)-Shirka Madasha Arrimaha Bani’aadannimada Soomaaliya (CHF 2025) oo ay soo qaban-gaabisay Hay’adda Maaraynta Musiibooyinka (SoDMA) ayaa ka furmay magaalada Baydhabo ee xarunta ku meel gaarka ah ee Dowlad Gobolleedka Koonfur Galbeed.
Shirka ayaa diiradda saarayaa wax ka qabashada xaaladaha bani’aadannimo ee dalka, iyadoo loo marayo hannaan loo dhan yahay, xoojinta hawlaha gargaarka, wax-ka-qabashada caqabadaha dhaqaale, isuduwidda iyo kor u qaadidda iskaashiga.
Guddoomiyaha Golaha Wakiilada Dowlad Goboleedka Koonfur Galbeed, ahna Ku-simaha Madaxweynaha, Mudane Cali Saciid Fiqi, oo shirka furay ayaa sheegay in muhiimad ballaarn ay leedahay in ay Soomaaliya ay ka fogaato ku tiirsanaanta kaalmada dibadda.
Guddoomiye Fiqi ayaa ku niix-niixsaday in loo jiheysto maalgelinta mashaariicda horumarineed ee bulshada ka taageeraya adkaysiga, sida kuwa ku saabsan wax-soo-saarka beeraha. Sidoo kale, wuxuu carrabka ku adkeeyey in nabadaynta dalka ay tahay tiirka ugu weyn ee horumarka iyo dhammaan howlaha kale.
